نئی دہلی: وزیر اعظم نریندر مودی نے اتوار کے روز کہا کہ ہندوستان دوسرے کے نقصان کی قیمت پر اپنی فلاح کے خواب نہیں دیکھتا اور ملک کی ترقی پوری انسانیت کی فلاح و بہبود سے وابستہ ہے۔ کناڈا کے مرکھم واقع سناتن مندر ثقافتی مرکز میں سردار ولبھ بھائی پٹیل کے مجسمہ کی نقاب کشائی کی گئی۔ اس سے متعلق منعقدہ ایک پروگرام کو ویڈیو کانفرنس کے ذریعہ خطاب کرتے ہوئے وزیر اعظم مودی نے کہا کہ یہ مجمسہ ہندوستان-کناڈا تعلقات کی علامت رہے گی۔وزیر اعظم مودی نے ہندوستان کے ثقافتی تعلقات کو مضبوط بنانے کے لئے مائیگرینٹ ہندوستانیوں کے ذریعہ ایک ‘بڑی پہل‘ کے طور پر مجسمے کی نقاب کشائی کے اقدام کا خیر مقدم کیا۔ وزیر اعظم مودی نے کہا، ’ہندوستان وہ سرفہرست سوچ ہے جو ‘واسودھیو کٹمبکم’ کی بات کرتا ہے۔
