ضمنی انتخاب کی دیگر دو نشستوں پر بھی ترنمول کی فتح‘کارکنوں کا جشن
کلکتہ: چیف منسٹرٰ ممتا بنرجی نے بھوانی پور سے 56,835 ووٹوں سے جیت حاصل کرلی ہے۔ یہ ممتا بنرجی کی ریکارڈ جیت ہے۔ الیکشن کمیشن کی تازہ رپورٹ کے مطابق ممتا بنرجی نے کل 56,835 ووٹ حاصل کئے۔ انہیں ای وی ایم کے ذریعے 64,709 ووٹ ملے ہیں۔ پوسٹل ووٹ 554 ہیں۔ دوسری طرف بی جے پی کی امیدوار پرینکا تبریوال کو ای وی ایم کے ذریعے 26,320 ووٹ ملے ہیں۔ ان کے پوسٹل ووٹ 108 ہیں۔ ترنمول کانگریس نے مرشدآباد کے شمشیر گنج اور جنگی پور سیٹوں پر بھی جیت حاصل کی ہے۔ترنمول کانگریس نے پانچ مہینے قبل مئی میں بنگال اسمبلی انتخابات میں شاندار جیت حاصل کرکے تیسری مرتبہ اقتدار حاصل کیا تھا۔ مگر ممتا بنرجی خود نندی گرام سیٹ سے اپنے پرانے ساتھی شوبھندو ادھیکاری سے سخت مقابلے میں انتخاب ہار گئیں تھیں۔ نندی گرام سے انتخاب لڑنے کا اعلان کرکے ممتا بنرجی نے بی جے پی کی حکمت عملی کو براہ راست چیلنج کیا تھا اور ان کی حکمت عملی کامیاب رہی۔ بی جے پی کو نندی گرام میں ممتا بنرجی کی موجودگی کی وجہ سے سخت نقصان ہوا اور ترنمول کانگریس کے کارکنان کا حوصلہ بلند ہوگیا۔اتوار کی صبح سے ہی ممتا بنرجی کے جیتنے کا فرق آہستہ آہستہ بڑھ رہا تھا۔ ترنمول کانگریس کے کارکنان حتمی نتائج کے اعلان سے بہت پہلے رقص کرنا شروع کر چکے تھے۔مرشد آباد کے سمشیر گنج اور جنگی پور میں بھی ترنمول کانگریس نے کامیابی حاصل کی ہے۔ بھوانی پور میں اس لحاظ سے کوئی سخت مقابلہ نہیں اور ترنمول کانگریس کی فتح یقینی تھی۔ تاہم ایک نشست جیتنا پانچ ماہ میں لگاتار دو بار بنگال جیتنے کے مترادف ہے۔
کیونکہ، جیتنے والے کا نام ممتا ہے۔ اپوزیشن کے ذریعہ دیئے جا رہے طعنہ ’’غیر قانون ساز چیف منسٹر‘‘ کا خاتمہ ہوگیا ہے۔ ممتا بنرجی کی شاندار جیت کے لئے پارٹی کے سینئر لیڈروں نے بھر پور محنت کی تھی۔ خود ممتا بنرجی نے کئی میٹنگوں کو خطاب کیا تھا۔