بھوپال : مدھیہ پردیش کی راجدھانی بھوپال میں آج او بی سی مہاسبھا کے وزیر اعلیٰ کی رہائش گاہ کے گھیراؤ کے اعلان کے پیش نظر انتظامیہ نے سخت کارروائی کرتے ہوئے کئی کارکنوں کو ضلع کی حدود سے باہر بھیج دیا ہے ۔ قبل ازیں اس مظاہرے کے پیش نظر پولیس نے وزیر اعلیٰ کی رہائش گاہ کے اطراف حفاظتی انتظامات سخت کر دیے تھے اور اس طرف جانے والی اہم سڑکوں پر رکاوٹیں کھڑی کر دی تھیں۔ مظاہرین کو اس علاقے میں جانے کی اجازت نہیں دی جا رہی ہے ۔کچھ مظاہرین علاقے کے قریب پہنچنے میں کامیاب ہو گئے تھے لیکن پولیس نے انہیں اپنی گاڑیوں سے دوسرے مقامات پر پہنچا دیا۔ او بی سی مہاسبھا کے کارکنوں پر کارروائی سے ریاست میں ایک بار پھر اس معاملے پر سیاست عروج پر پہنچ گئی ہے۔
