پچھلی حکومت کا کوئی وزیر شامل نہیں،دو خواتین کی شمولیت
گاندھی نگر :گجرات میں چیف منسٹرکی تبدیلی کے بعد نئی بننے والی بھوپندر پٹیل حکومت کے وزراء کی تقریب حلف برداری آج یہاں راج بھون میں منعقد ہوئی جس میں 10 کابینہ کی سطح سمیت 24 وزراء کو گورنر آچاریہ دیوورت نے عہدے اور رازداری کا حلف دلایا۔بی جے پی نے ‘نو ریپیٹ’ یعنی سابقہ حکومت کے کسی وزیر کو دوبارہ وزیر کا عہدہ نہ دینے کے فارمولے کے تحت وجے روپانی حکومت کے کسی بھی وزیر کو بھوپندر پٹیل حکومت کی کابینہ میں جگہ نہیں دی گئی ہے ۔ تمام وزراء نئے ہیں۔ پچھلی بار کے برعکس ، اس بار کوئی نائب وزیراعلی نہیں ہے اور کابینہ میں ذات اور علاقائی توازن قائم کرنے کی کوشش بھی کی گئی ہے ۔ ماضی میں کانگریس سے بغاوت کرکے بی جے پی میں شامل ہونے والے چہروں کو بھی وزیر کا عہدہ دیا گیا ہے ۔ پچھلی حکومت میں صرف ایک خاتون وزیر تھی جبکہ اس بار دو خواتین کو وزیر بنایا گیا ہے ۔ دونوں وزیر مملکت ہیں۔دس کابینہ وزراء کے علاوہ کل 14 وزرائے مملکت نے بھی حلف لیا ، جن میں پانچ آزاد انہ چارج والے ہیں ۔