ریاست گیر پد یاترا کا منصوبہ ، تلنگانہ میں کانگریس اقتدار کا یقین
حیدرآباد۔18۔ مارچ (سیاست نیوز) سی ایل پی لیڈر بھٹی وکرمارکا 25 مارچ سے اپنی پد یاترا کا دوبارہ آغاز کرینگے ۔ بھٹی وکرمارکا نے عوامی مسائل پر کھمم میں تمام اسمبلی حلقہ جات کا پد یاترا سے احاطہ کا فیصلہ کیا ہے ۔ پہلے مرحلہ کی پد یاترا میں اسمبلی کا بجٹ اجلاس شروع ہوا جس کے سبب پد یاترا کو روکنا پڑا۔ 25 مارچ سے دوبارہ پد یاترا شروع ہوگی۔ انہوں نے کہا کہ ریاست گیر سطح پر پد یاترا کرکے عوامی مسائل سے واقفیت حاصل کرنے اور حکومت کی ناکامیوں سے عوام کو واقف کرانے کا منصوبہ ہے۔ بھٹی وکرمارکا نے کہا کہ تلنگانہ میں کانگریس کا موقف مستحکم ہے اور آئندہ انتخابات میں کانگریس کو اقتدار حاصل ہوگا۔ انہوں نے کہا کہ تلنگانہ کانگریس اور عوام سونیا اور راہول گاندھی کی قیادت پر اعتماد کرتے ہیں۔ بی جے پی قائدین کے بیانات پر تنقید کرکے انہوں نے کہا کہ بنڈی سنجے اور رگھونندن راؤ تلنگانہ کی صورتحال پر گمراہ کن دعوے کر رہے ہیں۔ انہوں نے کہا کہ کانگریس کا دوسرا نام بھٹی اور بھٹی کا دوسرا نام کانگریس ہے۔ دوسروں کی طرح وفاداری بدلنا میرا شیوہ نہیں۔ بھٹی نے کہا کہ پارٹی قائدین سے مشاورت کے بعد آئندہ حکمت عملی طئے کی جائیگی۔ سی ایل پی عہدہ حاصل کرنے کے بعد انہوں نے ریاست گیر دورہ مکمل کرلیا تھا ، اب موجودہ حالات میں دوبارہ پد یاترا کا منصوبہ رکھتے ہیں۔ر
