ممبئی: مہاراشٹر کے گورنر بھگت سنگھ کوشیاری کے استعفیٰ کی پیشکش کے بعد نئے گورنروں کی تقرری کی افواہیں تیز ہوگئیں۔ کئی گورنروں کی پانچ سالہ مدت پوری ہو چکی ہے اور فی الحال انہیں توسیع دی گئی ہے۔ اروناچل پردیش کے گورنر بی ڈی مشرا اور آسام کے گورنر جگدیش مکھی نے اپنی پانچ سالہ میعاد پوری کر لی ہے۔ بی ڈی مشرا کے پاس میگھالیہ کا اضافی چارج بھی ہے، اسی طرح جگدیش مکھی کو بھی ناگالینڈ کا اضافی چارج ملا ہے۔ ان دونوں شمال مشرقی ریاستوں میں اسمبلی انتخابات کا عمل جاری ہے۔ سکم کے گورنر گنگا پرساد اور اوڈیشہ کے گورنر گنیشی لال بھی چار سال سے زیادہ عرصے سے گورنر رہے ہیں، حالانکہ ابھی پانچ سال مکمل ہونے میں وقت ہے۔ اگر ہم کوشیاری کے بارے میں بات کریں تو ان کے دور اقتدار کے تقریباً ڈھائی سال باقی ہیں۔
