چنڈی گڑھ: عام آدمی پارٹی نے دو بار کے سنگرور سے اپنے رکن پارلیمنٹ بھگونت مان کو پنجاب اسمبلی انتخابات میں اتار نے اور چیف منسٹر کے عہدہ کا امیدوار بنانے کا آج اعلان کیا ہے ۔ اس کا اعلان پارٹی کے قومی کنوینر اور دہلی کے چیف منسٹر اروند کیجریوال نے آج یہاں کیا۔ اس طرح عآپ ریاست کی پہلی پارٹی بن گئی ہے جس نے اسمبلی انتخابات کے لیے اپنے وزیر اعلیٰ کے چہرے کا اعلان کیا ہے۔کیجریوال نے کہا کہ گزشتہ ہفتے پارٹی نے ایک فون نمبر جاری کیا تھا جس پر لوگوں سے رائے مانگی گئی تھی کہ ریاست کا وزیر اعلیٰ کون ہونا چاہیے۔ انہوں نے کہا کہ اس سروے میں زیادہ سے زیادہ لوگوں نے بھگونت مان کے حق میں اپنی رائے ظاہر کی۔ انہوں نے کہا کہ اس پول میں پیر کی شام تک 21.59 لاکھ سے زیادہ پیغامات اور فون کال موصول ہوئے اور 93.7 فیصد لوگوں نے بھگونت مان کا نام دیا۔