صدرنشین اقلیتی کمیشن قمرالدین کا اقدام
حیدرآباد ۔11۔ مئی(سیاست نیوز) صدر نشین تلنگانہ اقلیتی کمیشن محمد قمرالدین نے بھینسہ میں فرقہ وارانہ تشدد کے واقعات پر ضلع کلکٹر اور سپرنٹنڈنٹ پولیس سے رپورٹ طلب کی ہے ۔ بھینسہ میں کل اشرار نے ایک مسجد پر حملہ کرتے ہوئے مصلیوں کو زخمی کردیا تھا۔ قمرالدین نے ضلع کلکٹر اور ایس پی سے ربط قائم کرتے ہوئے خاطیوں کے خلاف کارروائی اور صورتحال کو معمول پر لانے کیلئے تمام طبقات کے ساتھ بہتر تال میل کا مشورہ دیا ۔ انہوں نے واقعہ کی تفصیلات اور خاطیوں کے خلاف کی گئی کارروائی پر تفصیلی رپورٹ روانہ کرنے کی ہدایت دی ۔ قمرالدین نے کہا کہ چیف منسٹر کے چندر شیکھر راؤ گزشتہ 6 برسوں سے ریاست میں فرقہ وارانہ ہم آہنگی اور امن و امان کا ماحول برقرار رکھے ہوئے ہیں لیکن مٹھی بھر شرپسند عناصر صورتحال بگاڑنا چاہتے ہیں۔ قمرالدین نے کہا کہ اشرار کے خلاف سخت کارروائی کی جائے تاکہ وہ دوبارہ سر اٹھانے کی جرات نہ کریں۔