ریاست کے تمام 38 اضلاع کے 46 رائے شماری مراکزمیں سخت سکیورٹی
پٹنہ ۔ 13 نومبر (ایجنسیز) بہار اسمبلی انتخابات 2025 کے نتائج کا اعلان جمعہ (14 نومبر) کو ہونا ہے۔ اس سلسلے میں الیکشن کمیشن نے اعلان کیا کہ الیکٹرانک ووٹنگ مشینیں (ای وی ایم) کو سخت حفاظتی انتظامات کے تحت اسٹرانگ رومز میں رکھا گیا ہے۔ ووٹوں کی گنتی ریاست کے تمام 38 اضلاع کے 46 مراکز پر ہوگی۔ انتخابات میں استعمال ہونے والے ای وی ایم اور وی وی پی اے ٹی کو دوسطح کی سیکورٹی گھیرے میں رکھا گیا ہے۔ اسٹرانگ روم احاطے کی اندرونی حفاظت کی ذمہ داری سنٹرل آرمڈ پیرا ملٹری فورسیزکو سونپا گیا ہے جبکہ ضلعی پولیس کو باہری سیکیورٹی کی ذمہ داری دی گئی ہے۔ اس کے علاوہ 24 گھنٹے سی سی ٹی وی کی نگرانی اور دیگر حفاظتی اقدامات کیے گئے ہیں۔ہر اسٹرانگ روم کمپلیکس میں ایک کنٹرول روم بھی قائم کیا گیا ہے جہاں سینئر افسران مسلسل ڈیوٹی پر موجود رہیں گے۔ تمام ڈسٹرکٹ الیکشن افسران اور متعلقہ اسمبلی حلقوں کے ریٹرننگ افسران کو روزانہ اسٹرانگ رومز کا معائنہ کرنے کی ہدایت کی گئی ہے۔ ماک پول کے دوران یا ووٹنگ کے وقت خراب پائی گئی ای وی ایم اوروی وی پی اے ٹی کے ساتھ ساتھ غیر استعمال شدہ مشینوں کو الگ سے محفوظ رکھا گیا ہے۔دریں اثنا، پٹنہ کے ضلع الیکشن افسرکم ضلع مجسٹریٹ تیاگ راجن ایس ایم نے کہا کہ انتخابی ضابطہ اخلاق کی خلاف ورزی کو برداشت نہیں کیا جائے گا۔ رہنما خطوط کی وضاحت کرتے ہوئے انہوں نے کہا کہ کسی بھی قسم کے جلوس فتح پر پابندی ہے۔ کسی بھی فرد؍ سیاسی جماعت؍ تنظیم کی طرف سے سیاسی مقاصد سے متعلق کسی بھی قسم کے جلسے، جلوس، دھرنا یا مظاہرے پر پابندی ہوگی۔