نئی دہلی 23 مارچ (سیاست ڈاٹ کام) بہار بورڈ اگزام کے پرچوں کی جانچ میں حصہ نہ لینے کی وجہ سے 25000 سے زیادہ ہائی اسکول اساتذہ کو معطل کردیا گیا ہے اور ان پر کیس درج کیا گیا۔ واضح رہے کہ تقریباً پانچ لاکھ اساتذہ یکساں تنخواہ اور ساتویں پے کمیشن کو نافذ کرنے کا مطالبہ کرتے ہوئے ہڑتال کررہے ہیں۔ تقریباً 4.5 لاکھ پرائمری اور میڈیکل اسکول کے ٹیچر 17 فروری سے ہڑتال پر ہیں۔ بعد میں 25 فروری سے 50 ہزار سے زیادہ ہائی اسکول ٹیچر بھی اس میں شامل ہوگئے۔ جہاں پچھلے 10 دنوں سے کورونا وائرس کے مدنظر سبھی اسکول بند ہیں۔ وہیں فروری کے آخری دنوں کے بعد 75000 سے زیادہ سرکاری اسکولوں میں طلباء کی تعداد گھٹ گئی ہے جس سے حکومت کو مڈ ڈے میل کو بند کرنا پڑا۔ انڈین ایکسپریس کے مطابق بہار سیکنڈری اسکول ٹیچرس اسوسی ایشن کے جنرل سکریٹری شتروگھن پرساد سنگھ نے کہاکہ جب تک حکومت ان کے طویل عرصہ سے ملتوی مطالبات پر غور نہیں کرتی تب تک ہڑتال ختم نہیں کی جائے گی۔ اُنھوں نے کہاکہ ’حکومت یہ کہہ کر لوگوں کو گمراہ کرنے کی کوشش کررہی ہے کہ ساتویں پے کمیشن کو نافذ کیا گیا ہے لیکن اس کو نافذ نہیں کیا گیا۔ سیکنڈری اسکولوں کے اساتذہ کو ایف آئی آر اور معطلی کا سامنا کرنا پڑا کیوں کہ اُنھوں نے کاپی جانچ میں حصہ لینے کے سرکاری حکم پر عمل نہیں کیا۔ یہ اساتذہ دسویں بورڈ کی اگزام ڈیوٹی سے دور رہے تھے۔
