پٹنہ، 24 جولائی (یو این آئی) بہار میں بہتر رابطے اور دیہی انفراسٹرکچر کو مضبوط بنانے کی سمت میں فلائی اوور کا تعمیراتی کام تیزی سے آگے بڑھ رہا ہے ۔ مختلف اسکیموں کے تحت محکمہ دیہی تعمیرات کو اب تک کل 4,415 فلائی اوور کی تعمیر کے لیے منظوری دی گئی ہے ۔ ان میں سے 3,482 فلائی اوور کے لیے ایگریمنٹ کا عمل مکمل ہو چکا ہے ، اب تک 2,551 فلائی اوورکا تعمیراتی کام کامیابی کے ساتھ مکمل ہو چکا ہے ،ان سبھی فلائی اوور سے ہزاروں لوگوں کو فائدہ پہنچا ہے ، جو لوگ مختلف دیہاتوں میں رہتے ہیں۔ اس کے ساتھ ساتھ باقی 931 پلوں پر تعمیراتی کام تیزی سے جاری ہے ،تاکہ بروقت تعمیراتی کام مکمل ہوسکے ۔ بہار میں سب سے زیادہ فلائی اووروں کا تعمیراتی کام پردھان منتری گرام سڑک یوجنا (پی ایم جی ایس وائی) کے تحت ہوا ہے ۔ اس اسکیم کے تحت 2017 فلائی اووروں کو منظوری دی گئی ہے ، جن میں سے 1954 فلائی اووروں کے لیے معاہدے کیے گئے ہیں، جب کہ 1512 پلوں کی تعمیر مکمل ہو چکی ہے ، جب کہ 442 پل زیر تعمیر ہیں۔
