2 افراد گرفتار‘ٹارگٹ کلنگس کے منصوبہ کو ناکام بنانے این آئی اے کا دعویٰ
نئی دہلی : قومی تحقیقاتی ایجنسی (این آئی اے) نے اتوار کو بہار کے موتیہاری ضلع سے دو افراد کو مبینہ طور پر پاپولر فرنٹ آف انڈیا سے منسلک ‘دہشت گردی کے مشتبہ ماڈیول’ کے الزام میں گرفتار کیا ہے۔ گرفتار افراد کی شناخت مشرقی چمپارن ضلع کے رہنے والے تنویر رضا عرف برکاتی اور محمد عابد عرف آرین کے طور پر ہوئی ہے۔این آئی اے نے ہفتہ 4 فروری کو مشرقی چمپارن ضلع میں آٹھ مقامات پر چھاپہ ماری کرتے ہوئے پی ایف آئی کیڈرس کے ذریعہ بنائی گئی مبینہ ٹارگٹ کلنگ کی سازش کو ناکام بنانے کا دعویٰ کیا تھا۔ ذرائع نے بتایا کہ دونوں ٹارگٹ کلنگ کو انجام دینے کے لئے پہلے ہی منصوبہ بنا چکے تھے۔ اس کے علاوہ اسلحہ اور گولہ بارود کا بھی انتظام کر کرچکے تھے۔ میڈیا کے ذرائع نے بتایا یہ ہتھیار پی ایف آئی کے ہتھیار ٹرینر یعقوب عرف سلطان عرف عثمان کو سونپے جانے تھے، جو پی ایف آئی کیڈروں کیلئے ہتھیار ٹریننگ سیشن منعقد کررہے تھے تاکہ وہ اپنے ‘مبینہ دشمنوں’ کو نشانہ بناسکے۔این آئی اے کے چھاپے اور گرفتاریاں پی ایف آئی اور اس کے لیڈروں نیز کیڈروں کی پرتشدد اور غیرقانونی سرگرمیوں میں شامل ہونے کے بعد میں کی گئیں ، جو اسی مقصد سے پٹنہ کے پھلواری شریف علاقہ میں جمع ہوئے تھے۔ ذرائع نے کہا کہ ان گرفتاریوں کے ساتھ پی ایف آئی کے ایک مبینہ کلر ماڈیول کا پردہ فاش کرتے ہوئے ٹارگیٹ کلنگز کی سازش ناکام کی گئی ہے۔خیال رہے کہ اس سے پہلے پی ایف آئی ماڈیول سے وابستہ معاملات میں چار افراد کو گرفتار کیا گیا تھا اور ان کے پاس سے پی ایف آئی سے وابستہ کئی قابل اعتراض تحریر اور دستاویز ضبط کرنے کا دعوی کیا گیا تھا۔ وہیں چار فروری کو کی گئی تلاش کے دوران کئی ڈیجیٹل ڈیوائس ضبط کئے گئے ہیں۔ ذرائع نے کہا کہ معاملہ میں آگے کی جانچ جاری ہے۔ پاپولر فرنٹ آف انڈیا پر مرکزی حکومت کی جانب سے پابندی عائد کرنے کے بعد پاپولر فرنٹ آف انڈیا کے کیڈر کے خلاف کاروائیوں میں تیزی پیدا کردی گئی ہے اور ان کے مشتبہ ٹھکانوں پر دھاوے کئے جا رہے ہیں ۔
