پٹنہ: بہار کے مختلف اضلاع میں ڈینگی کے معاملات میں اضافہ ہو رہا ہے۔ محکمہ صحت کے پاس دستیاب اعداد و شمار کے مطابق ریاست میں ڈینگی کے 325 فعال معاملوں کا پتہ چلا ہے۔ بھاگلپور ضلع میں تقریباً 118 معاملے مثبت پائے گئے جبکہ ریاستی دارالحکومت پٹنہ سے 113 معاملے رپورٹ ہوئے۔ بھاگلپور میں بڑھتے ہوئے معاملات کو دیکھتے ہوئے، ضلع مجسٹریٹ نے سول سرجن کو جے ایل این میڈیکل کالج اور اسپتال مایا گنج میں 100 بستروں کا انتظام کرنے کی ہدایت دی ہے۔ اس کے علاوہ اسپتال انتظامیہ سے کہا گیا ہے کہ وہ ضلع میں پیراسیٹامول گولیاں، پلیٹ لیٹس، دیگر ضروری ادویات اور جانچ کی سہولیات کے لیے مناسب انتظامات کریں۔ یہ ہدایات دیگر اضلاع کو بھی جاری کر دی گئی ہیں۔ پٹنہ میں محکمہ صحت نے پی ایم سی ایچ، این ایم سی ایچ، پٹنہ ایمس، آئی جی آئی ایم ایس سے کہا ہے کہ وہ بستروں، ٹیسٹنگ کٹس اور ادویات کا انتظام کریں۔ محکمہ صحت نے مختلف میونسپل کارپوریشنوں کو یہ بھی ہدایت دی ہے کہ وہ پانی بھرے علاقوں میں لاروا مارنے والی دوائیں چھڑکیں اور اس کے علاوہ ویکٹر سے پیدا ہونے والی بیماریوں کے پھیلاؤ کو روکنے کے لیے باقاعدہ چھڑکاؤ کریں۔
