ہندوستان کی اسپورٹنگ اسپرٹ کی عکاس۔ وزیر اعظم کا من کی بات پروگرام سے خطاب
نئی دہلی : وزیر اعظم نریندر مودی نے حال ہی میں بہار میں منعقدہ کھیلو انڈیا یوتھ گیمس 2025 مقابلوں کو انتہائی کامیاب قرار دیا اور کہا کہ ہندوستان کی بڑھتی ہوئی اسپورٹس اسپرٹ کی مثال ہے ۔ وزیر اعظم نے ان مقابلوں میں شاندار کارناموں کا تذکرہ کیا اور کہا کہ ہندوستان کے نوجوان اتھیلیٹس کو عالمی سطح پر پہچانا جا رہا ہے ۔ اپنے ماہانہ ریڈیو پروگرام من کی بات سے خطاب کرتے ہوئے وزیر اعظم نے کہا کہ حال ہی میں کھیلو انڈیا گیمس بہت کامیاب رہے ۔ بہار کے پانچ شہروں میں کھیلو انڈیا گیمس کا انعقاد عمل میں لایا گیا ۔ مختلف زمروں میں میچس منعقد کئے گئے ۔ ملک بھر سے ان گیمس میں حصہ لینے والے اتھیلیٹس کی تعداد 5000 سے زائد کی تھی ۔ ان اتھیلیٹس نے بہار کی اسپورٹنگ اسپرٹ کی ستائش کی ہے اور بہار کے عوام کی میزبانی کو بھی سراہا ہے ۔ وزیر اعظم نے کہا کہ کھیلو انڈیا گیمس کا یہ ایڈیشن عالمی سطح پر ہندوستانی کھیلوں کیلئے ایک سنگ میل ثابت ہوا ہے ۔ وزیر اعظم نے کہا کہ بہار کی سرزمین بہت خاص ہے ۔ ان مقابلوں میں کئی بے مثال باتیں ہوئی ہیں۔ یہ کھیلو انڈیا یوتھ گیمس کا پہلا ایڈیشن تھا جو اولمپک چینل سے ساری دنیا تک پہونچا ۔ دنیا بھر کے عوام نے ان مقابلوں کو دیکھا اور نوجوان کھلاڑیوں کی صلاحیتوں کو سراہا ہے ۔ وزیر اعظم نے تمام میڈل جیتنے والوں خاص طور پر مہاراشٹرا ‘ ہریانہ اور راجستھان کے ٹاپ تین ونرس کو مبارکباد پیش کی ۔ وزیر اعظم نے کہا کہ کھیلو انڈیا گیمس میں اس بار جملہ 26 ریکارڈ بنائے گئے ہیں جو قابل تعریف ہیں۔ وزیر اعظم نے اتھیلیٹس کی بھی ستائش کی اور کہا کہ اترپردیش کے قادر خان اور شیخ ذیشان کے علاوہ راجستھان کے ہنس راج نے بہترین مظاہرہ کیا ہے ۔ اس بار بہار نے بھی جملہ 36 میڈلس حاصل کئے ہیں۔
