ہمارے پاس ایٹم بم ہے ، پھٹ گیا تو الیکشن کمیشن ہندوستان میں کہیں نظر نہیں آئے گا
نئی دہلی: یکم اگست:(ایجنسیز)لوک سبھا میں اپوزیشن لیڈر اور کانگریس کے سینئر رہنما راہول گاندھی نے جمعہ کو بہار میں جاری ووٹر لسٹ کی نظرثانی کے حوالے سے الیکشن کمیشن پر سنگین الزامات عائد کیے ہیں۔ انہوں نے دعویٰ کیا کہ ووٹ چوری ہو رہے ہیں اور اس عمل میں الیکشن کمیشن ملوث ہے۔میڈیا سے گفتگو کرتے ہوئے راہول گاندھی نے کہاکہ الیکشن کمیشن ووٹ چوری کر رہا ہے، اور میں یہ بات سو فیصد ثبوت کے ساتھ کہہ رہا ہوں۔ ہمارے پاس ایسا ثبوت ہے جو ‘ایٹم بم’ کی طرح ہے۔ اگر یہ پھٹ گیا تو آپ کو ہندوستان میں کہیں بھی الیکشن کمیشن نظر نہیں آئے گا۔انہوں نے مزید کہاکہ اگر افسران ریٹائر بھی ہو جائیں، تب بھی ہم انہیں نہیں چھوڑیں گے۔ ہم انہیں تلاش کریں گے کیونکہ وہ بھارت کے خلاف کام کر رہے ہیں، جو کہ غداری کے مترادف ہے۔ راہول گاندھی نے کہا کہ انہیں مدھیہ پردیش، مہاراشٹر اور لوک سبھا انتخابات میں ووٹوں کی چوری کا شبہ تھا، اور اس پر انہوں نے اپنی سطح پر چھ ماہ کی مکمل تفتیش کروائی۔ ہم نے محسوس کیا کہ ایک کروڑ ووٹروں کا اچانک اضافہ ہوا۔ جب ہم نے تفصیل میں جانچ کی تو ہمیں پتہ چلا کہ چوری ہو رہی ہے۔ الیکشن کمیشن ہماری مدد نہیں کر رہا تھا، اس لیے ہم نے خود تحقیق کرائی۔ جو ہمارے پاس ہے وہ دھماکہ خیز ہے۔انہوں نے واضح کیا کہ یہ سازش بھارتیہ جنتا پارٹی (بی جے پی) کے فائدے کے لیے کی جا رہی ہے۔ یہ کھلا اور بند معاملہ ہے، اس پر کوئی سوال نہیں اٹھا سکتا۔ ہم یہ سچائی جلد عوام کے سامنے رکھیں گے اور پھر پورا ملک دیکھے گا کہ ووٹ چوری کیسے کئے جا رہے ہیں۔راہول گاندھی کے اس بیان نے سیاسی حلقوں میں ہلچل مچا دی ہے، اور امکان ہے کہ آئندہ دنوں میں کانگریس اس مبینہ ‘ایٹم بم’ جیسے ثبوت کو عام کرے گی۔
الیکشن کمیشن نے خصوصی جامع نظر ثانی
کے بعد بہار ووٹر لسٹ کا مسودہ جاری کیا
پٹنہ، یکم اگست (یواین آئی) الیکشن کمیشن نے تقریباً ایک ماہ تک جاری خصوصی جامع نظر ثانی (ایس آئی آر) کے بعد آج بہار میں ووٹر لسٹ کا مسودہ جاری کر دیا ہے ۔الیکشن کمیشن کی جانب سے جاری کردہ ریلیز کے مطابق ڈرافٹ ووٹر لسٹ کی اشاعت کے ساتھ ساتھ ووٹرز اور مختلف سیاسی جماعتوں سے کہا گیا ہے کہ وہ اس حوالے سے دعوے اور اعتراضات درج کریں۔ یکم اگست سے یکم ستمبر 2025 تک متعلقہ الیکٹورل رجسٹریشن آفیسر کے سامنے اہل ووٹروں کے ناموں کو شامل کرنے اور نا اہل ووٹروں کے ناموں کو ہٹانے کے لیے مقررہ فارم کو پڑھ کر دعوے اور اعتراضات دائر کیے جاسکتے ہیں۔
بہار کے 7.24 کروڑ سے زیادہ ووٹروں نے گنتی فارم بھرے ہیں اور تمام ووٹرز فہرست میں شامل ہیں۔ کمیشن نے کہا کہ یہ ایک بے مثال شرکت ہے ۔کمیشن کے مطابق بغیر وجہ بتائے ڈرافٹ ووٹر لسٹ سے کسی کا نام نہیں نکالا جائے گا۔ بہار میں خصوصی جامع نظرثانی 2025 کے پہلے مرحلے (گنتی کے مرحلے ) کی کامیابی کے بعد الیکشن کمیشن کی طرف سے جاری کردہ فہرست کو آن لائن پورٹل https://voters.gov.in/download-eroll?stateCode=S04 پر دستیاب کرا دیا گیا ہے ۔ اس کے ساتھ ہی بہار کے تمام 38 ضلع مجسٹریٹس اورتمام 243 قانون ساز اسمبلی حلقوں کے 90,712 بوتھوں کی ڈرافٹ ووٹر لسٹ بھی تمام سیاسی جماعتوں کے ساتھ شیئر کی گئی ہے ۔