پٹنہ : بہار کے موتیہاری ضلع کے پپرا گاؤں میں ناگ پنچمی کے موقع پر مہاویری مارچ کے دوران دو گروپوں کے درمیان تصادم میں کم از کم چھ افراد زخمی ہوگئے۔ تشدد اس وقت شروع ہوا جب لوگوں کے ایک گروپ نے گاؤں میں مہاویری مارچ کا اہتمام کیا۔ وہ اونچی آواز میں بھکت گیتوں کے ساتھ لاٹھیوں کا مظاہرہ کر رہے تھے جب ایک دوسرے گروپ کے لوگوں نے مبینہ طور پر ان پر پتھراؤکیا۔ جلد ہی صورت حال کشیدہ ہوگئی جب گروپ نے دوسرے پر لاٹھیوں سے حملہ کیا۔تصادم میں چھ کے قریب افراد زخمی ہوئے جنہیں صدر اسپتال میں داخل کروایا گیا جہاں ان کی حالت مستحکم بتائی جاتی ہے۔ تاہم وہاں موجود پولیس نے تیزی سے کام کیا اور بھیڑکو منتشر کرنے کیلئے ہلکا لاٹھی چارج کیا۔اس سے قبل بگاہا میں پیر کو مہاویری مارچ کے دوران اسی طرح کی جھڑپ میں تقریباً 12 افراد زخمی ہوئے تھے۔
