بیلاروس ۔31 مارچ (سیاست ڈاٹ کام ) یورپ سمیت ایک تہائی دنیا کوکورونا وائرس کے باعث لاک ڈاون کا سامنا ہے اور ہر طرح کی سرگرمیاں روک دی گئی ہیں، لیکن یورپ کے کنارے پر موجود ایک ملک ایسا بھی ہے جو ہرخوف سے بے پرواہ کاروبار زندگی کو جاری رکھے ہوئے ہے۔ خبر رساں ادارے کے مطابق سابق سویت یونین کا حصہ رہنے والے مشرقی یورپ کے ملک بیلاروس میں فٹ بال لیگ جاری ہے۔ بیلاروس پریمیئر لیگ کا عام حالات میں زیادہ تذکرہ نہیںکیا جاتا لیکن اب فٹ بال شائقین کی توجہ اس جانب ہوگئی ہے کہ کیونکہ یورپ میں یہ واحد جگہ ہے جہاں فٹ بال کا کھیل جاری ہے۔ایف سی منسک اور ڈائنامو منسک کے درمیان مقابلہ ہوا جسے تین ہزار تماشائیوں نے اسٹیڈیم میں بیٹھ کر دیکھا۔ ڈائنامو منسک نے ان حالات میں ہونے والے میچ کی رپورٹ میں لکھا ہے کہ یہ اس کرہ ارض پرکھیلے جانے والا واحد فٹ بال میچ ہے۔واضح رہے کہ بیلاروس کورونا وائرس کی وجہ سے زیادہ متاثر نہیں ہوا ہے اور وہاں مریضوں کی تعداد ایک سو سے کم ہے اور تاحال اس وبا سے کوئی شخص ہلاک نہیں ہوا ہے۔بیلاروس کے صدر الیگزینڈر لکاشینکو کو اس کی کوئی فکر نہیں ہے اور انہوں نے اپنے شہریوں کو تجویز دی ہے کہ بیماری کا مقابلہ کرنے کے لیے ووڈکا پیو۔ بیلاروس فٹ بال فیڈریشن کے ترجمان نے کہا ہے کہ میچ کروانے سے پہلے تمام حفاظتی اقدامات کیے گئے تھے۔
