نئی دہلی، 24 اکتوبر (یو این آئی) مہاراشٹرا کے ناگپور میں انفورسمنٹ ڈائریکٹوریٹ (ای ڈی) کے ذیلی علاقائی دفتر نے جمعہ کو کالے دھن کی روک تھام سے متعلق ایکٹ (پی ایم ایل اے ) کے تحت 67.79 کروڑ روپے کی منقولہ اور غیر منقولہ جائیدادیں ضبط کرنے کا اعلان کیا۔ یہ کارروائی کارپوریٹ پاور لمیٹڈ اور اس کے پروموٹرز و ڈائریکٹرز منوج جیسوال، ابھیجیت جیسوال، ابھیشیک جیسوال اور دیگر کے خلاف کی گئی ہے ۔ ”جرم سے حاصل شدہ آمدنی(پی او سی) میں مہاراشٹرا، کولکاتہ، دہلی اور آندھرا پردیش میں بینک بیلنس، زمینیں، عمارتیں، فلیٹس اور کاروباری مقامات شامل ہیں۔ یہ جائیدادیں پروموٹر و ڈائریکٹر منوج جیسوال، ان کے اہلِ خانہ، ان کے زیر کنٹرول شیل کمپنیوں اور ان کے اہم ساتھی سنتوش جین کے نام ہیں، جنہوں نے پی او سی اور اہلِ خانہ کی منی لانڈرنگ میں فعال کردار ادا کیا۔ ای ڈی نے مرکزی تفتیشی بیورو (سی بی آئی) کی جانب سے کارپوریٹ پاور لمیٹڈ، اس کے پروموٹرز، ڈائریکٹرز اور دیگر کے خلاف مجرمانہ سازش،دھوکہ دہی اور جعل سازی کے الزامات میں درج ایف آئی آر کی بنیاد پر پی ایم ایل اے تحقیقات شروع کی تھیں۔ ای ڈی کی تحقیقات سے معلوم ہوا کہ ملزمین نے قرض کی رقم میں چالاکی اور منی لانڈرنگ کیلئے 800 سے زیادہ فرضی کمپنیوں اور 5,000 بینک اکاؤنٹس کا استعمال کیا۔ اس معاملے میں پہلے ای ڈی نے ناگپور، کولکاتہ اور وشاکھاپٹنم میں متعدد جگہوں پر چھاپے مارے ، جہاں متعلقہ دستاویزات، ریکارڈ، ڈیجیٹل آلات، نقد رقم برآمد اور ضبط کی گئی۔ اس کے علاوہ، فہرست شدہ حصص، سیکیورٹیز، میوچل فنڈز اور مدتِ جمع سمیت منقولہ جائیدادیں بھی ضبط کی گئیں۔ آج کے ضبطی اقدام سے پہلے اس معاملے میں 503.16 کروڑ روپے کی جائیدادیں ضبط کی گئی تھیں۔ ای ڈی کی تازہ کارروائی کے بعد اب تک کل 571 کروڑ روپے کی جائیدادیں ضبط یا قبضے میں لی جا چکی ہیں۔