لندن ۔ انگلینڈ ٹسٹ ٹیم کے کپتان بین اسٹوکس ٹی 20 ورلڈ کپ نہیں کھیلیں گے۔ انگلینڈ کرکٹ بورڈ (ای سی بی) نے کہا ہے کہ بین اسٹوکس نے ورلڈ کپ کی سلیکشن میں دلچسپی نہ رکھنے کی تصدیق کی ہے، ٹسٹ کپتان بین اسٹوکس کا اولین توجہ بولنگ کے لیے مکمل فٹ ہونا ہے۔ ای سی بی نے کہا کہ بین اسٹوکس نہ صرف سری لنکا اور ویسٹ انڈیز کے خلاف ٹسٹ سیریز بلکہ مستقبل کے لیے فٹ ہونے کے خواہاں ہیں۔ اس حوالے سے بین اسٹوکس نے کہا ہے کہ میں بولنگ فٹنس کے لیے بڑی محنت کر رہا ہوں، میں تمام فارمیٹ میں آل راؤنڈر کی حیثیت سے کھیلنا چاہتا ہوں۔ بین اسٹوکس نے کہا کہ آئی پی ایل اور ورلڈ کپ کی قربانی دینے سے مجھے مستقبل میں آل راؤنڈر کی حیثیت سے کھیلنے میں مدد ملے گی۔ انگلش ٹسٹ ٹیم کے کپتان نے مزید کہا کہ میری کپتان، کوچ اور تمام ٹیم کے لیے نیک خواہشات ہیں۔
