ممبئی۔8 مئی (سیاست ڈاٹ کام) ہندوستانی ٹینس اسٹار ثانیہ مرزا نے مچل اسٹارک کے حوالے سے جورو کا غلام والی ٹویٹ کی وضاحت کردی۔ رواں برس ہندوستان سے ویمنز ٹی 20 ورلڈ کپ فائنل کے موقع پر مچل اسٹارک جنوبی افریقہ میں اپنا ونڈے میچ چھوڑ کر اہلیہ ویمن کرکٹ اسٹار الیسا ہیلی کی حمایت کرنے میلبورن اسٹیڈیم پہنچے تھے۔ جس پر ثانیہ مرزا نے ٹویٹ کیا تھا کہ اگر ایسا جنوبی ایشیا میں کسی نے کیا ہوتا تو اسے جوروکا غلام کہا جاتا۔اب ہندوستانی کرکٹرز جمیا روڈریگوئز اور سمرتی مندھانا سے بات چیت میں ثانیہ نے کہا کہ ہمارے معاشرے میں خواتین کو توجہ باٹنے کی وجہ قرار دیا جاتا ہے، میں اور انوشکا شرما اس کا نشانہ بنتی ہیں، جب ہمارے شوہر اچھا مظاہرہ کریں تو وہ ان کی صلاحیت ہوتی اور جب اچھا نہیں کھیل پاتے تو وجہ ہمیں قرار دیا جاتا ہے۔
