سابقہ حکومت نے رشوت کے ذریعہ تلنگانہ کو لوٹا ، پروفیسر کودنڈا رام کا تحریک مسلم شبان کے اجلاس سے خطاب
حیدرآباد /31 جنوری ( پریس نوٹ ) تلنگانہ ایک طاقتور اور خوبصورت ریاست ہے ۔ صدیوں سے یہاں بھائی چارہ اور محبت رہی ہے ۔ یہاں کا خمیر مدد ، محبت پر ہے ۔ ان خیالات کا اظہار تحریک مسلم شبان کے صدر دفتر پر منعقدہ اجلاس جس کی صدارت جناب محمد مشتاق ملک صدر تحریک مسلم شبان نے کی ۔ پروفیسر کوڈنڈا رام نامزد ایم ایل سی نے کہا کہ آزادی کے بعد سے تلنگانہ کے ساتھ مسلسل ناانصافی ہوتی رہی حتی کہ قیام تلنگانہ 2014ء کے بعد بھی عوام کے ساتھ ناانصافی ہوتی رہی ۔ تلنگانہ کا قیام کسی ایک خاندان یا ایک شخص کے فائدے کیلئے نہیں آیا تھا ۔ کئی پراجکٹ میں رشوت کے ذریعہ تلنگانہ کو لوٹا گیا ۔ موجودہ کانگریس حکومت کی ہم نے تائید کی ۔ ایک آزاد اور ترقی یافتہ تلنگانہ بنانے کیلئے اور جو اقدامات حکومت کر رہی وہ عوام کے مفاد میں ہیں اور ریونت ریڈی حکومت کے ساتھ ہمارا تعاون ہے جو ملک اور عوام کے مفاد میں ہے ۔ بی آر ایس اقتدار سے بے دخل ہوگئی مگر چور دروازوں سے حکومت کو نقصان پہونچانے کی سازشیں کر رہی ہے جو ناکام رہے گی ۔ بی آر ایس اب ایم ایل سی بننے پر بھی پریشان ہے اور رکاوٹیں کھڑی کر رہی ہے ۔ جناب محمد مشتاق ملک نے اپنی صدارتی تقریر میں کہا کہ تلنگانہ محبت ، ایثار ، قربانی کی ریاست ہے ۔ اس کی رواداری کی تاریخ آج کی نہیں ایک صدی سے بھی زیادہ کی رواداری کی تاریخ ہے۔ نظام دکن آصف سابع کا دور بھی محبت و رواداری کا رہا ہے ۔ جناب محمد مشتاق ملک نے کہا کہ ہم نے کانگریس کی تائید کی انصاف اور فرقہ پرستی کے خلاف آر ایس ایس کے نظریہ کے خلاف لڑائی کی ہم مکمل حمایت کرتے ہیں ۔ جناب محمد مشتاق ملک نے کہا کہ ریاست میں حکومت کی بقا اور مودی کی حکومت کی شکست کیلئے مسلمانوں کو متحد جدوجہد کرنا ضروری ہے ۔ دستور اور ملک کی بقاء کی لڑائی میں ہم کو اہم رول ادا کرنا ہے ۔ بے روزگاری اور تعلیم کیلئے تحریک مسلم شبان جدوجہد کرے گی ۔ جناب عبدالحق قمر ، جناب ایم اے غفار نائب صدور شبان ، سماجی جہد کاروں نے کثرت سے پروفیسر کودنڈا رام ، جناب محمد مشتاق ملک کی گلپوشی کی ۔ جناب شیخ محمد اکبر انچارج حلقہ اسمبلی ملک پیٹ ، سید نظام الدین ترجمان ریاستی کانگریس ، سید فیصل ، سید سمیع ، محمد اظہر ، محسن ایڈوکیٹ نے شرکت کی ۔ حافظ خالد علی خان قادری نے قرات کلام پاک سے اجلاس کا آغاز کیا ۔ مفتی منار نے ترجمہ قرآن پیش کیا جناب سید عبدالمنان نے کارروائی چلائی اور شکریہ ادا کیا ۔
