نئی دہلی: کانگریس کے صدر ملکارجن کھڑگے نے عام آدمی پارٹی اور بی جے پی کو کسان مخالف قرار دیتے ہوئے جمعرات کو کہا کہ ان دونوں نے کسانوں کے خلاف ملی بھگت کی ہے اور ملک کے کسانوں کو زبردستی احتجاج کے مقام سے ہٹا دیا ہے ۔ کھڑگے نے کہا کہ ایسا لگتا ہے کہ دو کسان مخالف پارٹیاں ملک کے کسانوں کے خلاف اب ایک ہو گئی ہیں۔ پہلے پنجاب حکومت نے کسانوں کو بات چیت کے لیے بلایا، پھر انہیں زبردستی احتجاج کے مقام سے ہٹایا۔ انہوں نے کہا کہ پنجاب پولیس کی طرف سے سینئر کسان لیڈروں جگجیت سنگھ ڈلیوال اور سرون سنگھ پنڈھر کی زبردستی حراست میں لینے کی جتنی مذمت کی جائے کم ہے ۔ اقتدار کے نشے میں چوربی جے پی۔اے اے پی دونوں کسانوں کی مجرم رہی ہیں۔ ملک نہیں بھولا ہے ، مندسور، مدھیہ پردیش کی بی جے پی حکومت جب کسانوں پر گولیاں برسائی تھیں۔ لکھیم پور۔کھیری میں مودی حکومت کے وزیر کے بیٹے نے کسانوں کو کس طرح کچلا تھا۔
کانگریس صدر نے کہاکہ کس طرح کیجریوال کی ریلی میں راجستھان کے ایک کسان نے 2015 میں پھندا لگالیاتھا اور وہ بے رحم بنے تماشہ دیکھ رہے تھے ۔ مودی جی کا کسانوں سے کیا گیا ایم ایس پی کا وعدہ ہو، یا عام آدمی پارٹی کا دہلی میں تین کالے قوانین کا تیزی سے نفاذ، ان دونوں پارٹیوں نے ملک کے ہمارے ان داتا کے ساتھ دھوکہ کیا ہے ۔ ملک کے 62 کروڑ کسان، ان کسان مخالف پارٹیوں کو کبھی معاف نہیں کریں گے ۔
