پرتاپ گڑھ: ملک میں بے روزگاری و مہنگائی عروج پر ہونے کے سبب آج پریشان حال لوگوں کے سامنے ایک اہم مسئلہ ہے۔ حکومت مہنگائی و بیروزگاری پر کنٹرول کرنے کے برعکس ملک میں آئندہ ہونے والے اسمبلی الیکشن کیلئے فرقہ وارانہ حمکت عملی پر کام کرنے میں مصروف ہے جس کے سبب لوگ بے کاری و بھکمری کے دہانے پر پہنچ گئے ہیں ۔پیس پارٹی کے قومی صدر ڈاکٹر ایوب سرجن نے میڈیا کو جاری بیان میں مذکورہ تاثرات کا اظہار کیا ۔انہوں نے کہا کہ جب سے بی جے پی مرکز و صوبوں میں زیر اقتدار ہے اسی وقت سے ملک میں ابتر اقتصادی پالیسی کے سبب بے روزگاری بڑھی اور نجکاری سے حالات بگڑے ہیں، اس سے صرف سرمایہ داروں کو فائدہ پہنچ رہا ہے ۔ حکومت جو اقتصادی پالیسی نافذ کر رہی ہے اس سے عام آدمی کے برعکس سرمایہ داروں کی تجوری بھر رہی ہے ۔ نوٹ بندی کے بعد کورونا کے حالات میں حکومت کی شدید ناکامی کے سبب جہاں لوگوں کو جان گنوانی پڑی ،وہیں اقتصادی طور پر جو گراوٹ آئی ہے ، ابھی تک حکومت اسے سنبھالنے سے قاصر ہے ۔کورونا اوقات سے بند تجارت و صنعت کے سبب جو بیروزگاری و بے کاری بڑھی ہے اس سے ملک بھکمری کے دہانے پر ہے ۔ بی جے پی اپنے تئیں لوگوں کے اشتعال کو دیکھتے ہوئے آئندہ اسمبلی الیکشن میں اپنی کامیابی کیلئے فرقہ وارانہ کارڈ کھیلنا شروع کر دیا ہے ۔
