لکھنؤ:28 نومبر(یواین آئی) اتر پردیش میں جاری ووٹر لسٹ کی نظرثانی مہم(ایس آئی آر) کے حوالے سے سماج وادی پارٹی کے قومی صدر اکھلیش یادو نے ایک بار پھر حملہ بولا ہے ۔ انہوں نے کہا کہ “بی جے پی، اس کے حواری اور حکومت نیز الیکشن کمیشن کے کچھ بدعنوان عناصر مل کر پورے انتخابی نظام کو اغوا کر رہے ہیں۔ انہوں نے ملک کے عوام سے اپیل کی کہ وہ “اس سرعام لوٹ” کے خلاف متحد ہو کر جمہوریت کی حفاظت کریں۔ جمعہ کو پارٹی کی جانب سے جاری بیان میں اکھلیش یادو نے ووٹر لسٹ کی نظرثانی کے دوران بڑے پیمانے پر گھپلے بازی کا سنگین الزام لگاتے ہوئے تمام اپوزیشن جماعتوں کے ساتھ ساتھ این ڈی اے کے اتحادیوں سے بھی بی جے پی کے “ووٹ کٹوانے کے بڑے سازشی منصوبے کے خلاف متحد ہونے کی اپیل کی ہے۔ انہوں نے کہا کہ جو پارٹیاں بی جے پی کو اپنا اتحادی سمجھ رہی ہیں، “سب سے پہلے بی جے پی انہیں کا خاتمہ کرے گی۔” انہوں نے تمام اہل وطن سے اپیل کی کہ ایس آئی آر سے متعلق “گھپلے بازی”کو روکنا وقت کی سب سے بڑی ضرورت ہے ۔ اکھلیش یادو نے کہا کہ یہ جمہوریت کے ساتھ “دھوکہ دہی” ہے اور اس کے دور رس منفی نتائج ہوں گے۔
انہوں نے خبردار کیا کہ “آج ووٹ کاٹا جا رہا ہے ، کل کھیت، زمین، مکان، راشن، ذات، ریزرویشن اور پھر کھاتوں اور متوسط طبقے کے لاکر تک بات پہنچ جائے گی۔” انہوں نے اسے ملک کو انگریزوں کے دور سے بھی بدتر حالت میں لے جانے والی سازش قرار دیا۔ انہوں نے الزام لگایا کہ ریاست کے کئی اضلاع میں ڈسٹرکٹ مجسٹریٹ؍ ڈسٹرکٹ الیکشن آفیسر، اے ڈی ایم (الیکشن)، ایس ڈی ایم (ای آر او) اور سپروائزر بی ایل او پر دباؤ ڈال کر شماریاتی فارم کو زبردستی “تھرڈ آپشن” میں جمع کروا رہے ہیں۔ اکھلیش کے مطابق بی ایل او کی جانب سے پہلے اور دوسرے آپشن کے معیار کو پورا کرنے والے ووٹروں کو بھی تیسرے آپشن میں ڈالنے کی وجہ سے 9 دسمبر 2025 کو شائع ہونے والے ڈرافٹ رول میں کروڑوں ووٹروں کے نام مشتبہ زمرے میں جا سکتے ہیں۔
