اگرتلہ : شمال مشرقی ریاست تریپورہ میں اندرونی جھگڑوں کا سامنا کر رہے بی جے پی کے سینئر ایم ایل اے ارون چند بھومک نے عوام کی نظروں میں آئے وزیر تعلیم رتن لال ناتھ کو ہٹائے جانے اور ان کے خلاف مرکزی تفتیشی بیورو (سی بی آئی) سے انکوائری کا مطالبہ کیا۔مسٹر بھومک نے وزیر تعلیم کے خلاف سخت لہجے میں کہا کہ گزشتہ ساڑھے چار برسوں میں مسٹر ناتھ نے تریپورہ کے تعلیمی نظام کی ریڑھ کی ہڈی کو تباہ کر دیا ہے اور محکمے میں بدعنوانی میں ملوث انتظامیہ کو فروغ دیا ہے ۔ وزیر تعلیم کی وجہ سے اساتذہ اور افسران کی خدمت میں کوئی دلچسپی نہیں رہ گئی ہے ۔ شمال مشرقی علاقے کے ایک سینئر وکیل بھومک، گزشتہ 50برسوں سے سیاست میں ہیں اور انہوں نے ترنمول کانگریس سے لوک سبھا سمیت کئی انتخابات میں حصہ لیا تھا، لیکن بی جے پی کے ٹکٹ پر جنوبی تریپورہ کے بیلونیا حلقہ سے 2018 کا اسمبلی الیکشن جیتنے میں کامیاب ہوئے ۔ انہوں نے الزام لگایا کہ ٹرانسفر پالیسی اور وزیر تعلیم کے مضحکہ خیز فیصلوں کی وجہ سے جنوبی تریپورہ کے اسکولوں اور کالجوں کا بنیادی تعلیمی ماحول متاثر ہوا ہے ۔ انہوں نے کہا کہ زمینی صورتحال کا اندازہ لگائے بغیر اساتذہ کا وقتاً فوقتاً ایک جگہ سے دوسری جگہ تبادلہ کیا جاتا ہے اور حال ہی میں بیلونیا کالج کے فزکس اور ایجوکیشن کے واحد اساتذہ کو عہدے سے ہٹا دیا گیا۔
