کانگریس قائد کا احمد آباد میں خطاب‘ مختلف حادثات کے متاثرہ خاندانوں سے ملاقات
احمد آباد:لوک سبھا میں حزب اختلاف کے لیڈر راہول گاندھی آج گجرات دورہ پر ہیں۔ احمد آباد میں انھوں نے آج کانگریس کارکنان سے ملاقات کی اور پھر پارٹی کارکنان کی ایک تقریب سے خطاب کرتے ہوئے وزیر اعظم مودی کے ساتھ ساتھ بی جے پی پر بھی شدید تنقید کی۔ انھوں نے کہا کہ ’’کیا آپ سوچ سکتے تھے کہ ایودھیا میں بی جے پی ہارے گی، نریندر مودی وارانسی سے جان بچا کر نکلیں گے۔ میں آپ کو بتا رہا ہوں کہ جیسے بی جے پی ایودھیا میں ہاری، ویسے ہی گجرات میں بھی ہارنے جا رہی ہے۔ گجرات کی عوام کو صرف ایک کام کرنا ہے۔ آپ کو ڈرنا نہیں ہے۔ اگر آپ بغیر ڈرے بی جے پی سے لڑ گئے تو بی جے پی سامنے نہیں کھڑی ہو پائے گی۔راہول گاندھی نے گجرات کی عوام سے کہا کہ آپ نے بہت برداشت کیا ہے، بہت لاٹھیاں کھائی ہیں۔ میں آپ سے کہنا چاہتا ہوں کہ کانگریس کی ٹیم میں، میری بہن پرینکا، سبھی سینئر لیڈران آپ کے ساتھ یہاں کھڑے ہوں گے۔ سب مل کر ان کی حکومت کو توڑیں گے۔ انھوں نے کانگریس کارکنان سے مخاطب ہوتے ہوئے کہا کہ میں آپ سے یہاں کہنے آیا ہوں کہ انھوں نے ہمارے دفتر پر حملہ کیا ہے لیکن ہمیں ڈرنا نہیں ہے۔ انھوں نے ہمیں چیلنج دیا ہے۔ انہوں نے کہا کہ ڈرو مت ‘ ڈراؤ مت ۔اب کانگریس پارٹی نریندر مودی اور بی جے پی کو گجرات میں ہرائے گی۔راہول گاندھی نے ایودھیا میں بی جے پی کی شکست کا تذکرہ کرتے ہوئے کہا کہ میں نے پارلیمنٹ میں ایودھیا کے رکن پارلیمنٹ سے پوچھا کہ بی جے پی ایودھیا میں کیوں ہار گئی؟ انھوں نے جواب دیا کہ ایودھیا کے لوگوں سے زمینیں چھینی گئیں، لوگوں کے دکان۔مکان توڑے گئے اور انھیں معاوضہ نہیں دیا گیا۔ انٹرنیشنل ایئرپورٹ کے نام پر کسانوں کی زمین لی گئی، آج تک انھیں معاوضہ نہیں ملا۔ رام مندر کے افتتاح میں ایودھیا کی عوام کو مدعو بھی نہیں کیا گیا۔ اسی لیے ایودھیا کی عوام غصے میں تھی اور انھوں نے بی جے پی کو ہرا دیا۔ اپنی تقریر کے دوران راہول گاندھی نے یہ بھی بتایا کہ ایودھیا سے رکن پارلیمنٹ اودھیش پرساد کے مطابق نریندر مودی وارانسی سے نہیں بلکہ ایودھیا سے انتخاب لڑنا چاہتے تھے۔ ایودھیا میں اس کیلئے 3 مرتبہ سروے بھی کرایا گیا، لیکن سروے والوں نے کہا کہ اگر نریندر مودی ایودھیا سے انتخاب لڑیں گے تو ہار جائیں گے اور ان کا سیاسی کیریئر ختم ہو جائے گا۔ پھر انھوں نے وارانسی سے ہی انتخاب لڑنے کا فیصلہ کیااور وہاں سے بھی وہ کسی طرح جان بچا کر نکلے ہیں۔واضح رہے کہ کانگریس کارکنان کو خطاب کرنے کے بعد راہول گاندھی نے راجکوٹ گیمنگ زون، موربی پْل حادثہ، سورت آگزنی اور وڈودرا ہرنی بوٹ حادثہ کے متاثرہ بعض خاندانوں سے ملاقات۔ لوک سبھا میں اپوزیشن لیڈر بننے کے بعد راہول گاندھی کا یہ پہلا گجرات دورہ ہے۔ لوک سبھا میں صدر جمہوریہ کی تقریر پر شکریہ کی تحریک کے دوران ہی راہول گاندھی نے کہا تھا کہ اس بار (2027 اسمبلی انتخاب) وہ گجرات میں بی جے پی کو شکست دیں گے۔
راہول گاندھی کا کل منی پور کا دورہ
نئی دہلی: کانگریس لیڈر راہول گاندھی 8 جولائی کو منی پور کا دورہ کریں گے۔ یہ شمال مشرقی ریاست منی پورگزشتہ چند ماہ سے تشدد کی آگ میں جل رہی ہے۔ راہول گاندھی وہاں کانگریس لیڈروں سے بھی ملاقات کریں گے۔ اس سے پہلے وہ ہاتھرس کے دورے پر گئے تھے۔ حال ہی میں ہاتھرس میں بھولے بابا کے ستسنگ کے دوران بھگدڑ مچنے سے سینکڑوں افراد کی جانیں گئیں۔ راہول گاندھی مہلوکین کے اہل خانہ کو تسلی دینے ہاتھرس کے دورے پر تھے۔دریں اثنا، انہوں نے مرکزی حکومت سے متاثرین کو دی جانے والی رقم میں اضافہ کرنے کا مطالبہ کیا۔ اس کے بعد راہول گاندھی گجرات پہنچے۔ ہاتھرس اور احمد آباد کے بعد راہول گاندھی نے منی پور جانے کا اعلان کیا ہے۔ قابل ذکر ہے کہ راہول گاندھی نے منی پور کے تھوبل علاقے سے ہی بھارت جوڑو نیائے یاترا شروع کی تھی۔ راہول منی پور میں جاری تشدد کو لے کر مرکزی حکومت پر لگاتار تنقید کر رہے ہیں۔ اس سے قبل وہ پارلیمنٹ میں بھی یہ مسئلہ اٹھا چکے ہیں۔لوک سبھا انتخابات میں کانگریس نے منی پور کی دو لوک سبھا سیٹوں پر جیت کا جھنڈا لہرایا ہے۔ کانگریس لیڈروں کا الزام ہے کہ مرکزی حکومت منی پور کو مسلسل نظر انداز کر رہی ہے۔