نئی دہلی: کانگریس نے کہا ہے کہ لوک سبھا میں قائد حزب اختلاف راہول گاندھی کا امریکہ میں سکھوں کے بارے میں دیا گیا بیان درست ہے اور اس سے متعلق بی جے پی کے پروپیگنڈے کا کوئی جواز نہیں ہے ۔ پنجاب کے سابق وزیر اعلی چرنجیت سنگھ چنی اور پنجاب اسمبلی میں اپوزیشن لیڈر پرتاپ سنگھ باجوہ نے جمعہ کو یہاں پارٹی ہیڈکوارٹر میں ایک پریس کانفرنس میں کہا کہ مسٹر گاندھی نے امریکہ میں جو کچھ کہا ہے ، اس میں سچائی ہے ۔ انہوں نے کہا کہ ہمارے ملک کے کسان کسی ایک مذہب سے تعلق نہیں رکھتے ۔ جب کسان تحریک چلی تو پنجاب، ہریانہ، دہلی، راجستھان، اتر پردیش سمیت کئی ریاستوں کے کسان اس میں شامل تھے ، لیکن وزیر اعظم نریندر مودی نے کسانوں کی بات سننے کیلئے 10 منٹ کا وقت بھی نہیں نکالا۔ جب راہول گاندھی امریکہ گئے تو انہوں نے وہاں بتایا کہ کانگریس نے ملک کی آزادی میں کیا تعاون کیا ہے ۔ انہوں نے کہا کہ ہماری پارٹی کا نظریہ لوگوں کے آئینی حقوق کی حفاظت کرنا ہے اور راہول گاندھی نے کہا ہے کہ ملک میں حالات ایسے ہوتے جا رہے ہیں کہ لوگوں کو تقسیم کرنے کی کوشش کی جا رہی ہے۔
لیکن یہ بی جے پی کی عادت بن گئی ہے کہ وہ ہر چیز کی غلط تشریح کرتی ہے ۔ جب وزیراعظم مودی نے زرعی قوانین کو واپس لیا تو انہوں نے ایم ایس پی کی قانونی ضمانت دینے کے ساتھ کئی اور وعدے بھی کئے تھے ۔ لیکن جب ہمارے کسان بھائیوں نے اس بارے میں بات کرنے کے لیے دہلی آنا چاہا تو ان کے راستے میں کیلیں نصب کر دی گئیں۔
کانگریس کے لیڈروں نے کہا کہ راہول گاندھی امریکہ میں یہی باتیں کہہ رہے ہیں کہ جہاں بھی لوگوں کے حقوق چھینے جائیں گے ، کانگریس ان کے لیے آواز اٹھائے گی۔ انہوں نے امریکہ میں جو کچھ کہا اس میں سچائی تھی۔ راہول گاندھی جی نے اس بات پر تشویش ظاہر کی تھی کہ ملک میں جس طرح ایس سی، ایس ٹی، او بی سی اور اقلیتوں کے ساتھ سلوک کیا جا رہا ہے ، وہی سکھوں کے ساتھ نہیں ہونا چاہیے ۔ انہوں نے سکھوں کے حق میں بات کی ہے ، ہم ان کی تعریف کرتے ہیں۔ بی جے پی کو اس بات کا دکھ ہے کہ راہول گاندھی نے سکھوں کے حق میں بات کی ہے ۔ اس لیے وہ ان کی باتوں کو توڑ مروڑ کر پیش کر رہی ہے ۔’’
