لکھنؤ: سماج وادی پارٹی(ایس پی) سربراہ اکھلیش یادو نے دوہرایا کہ بی جے پی سیاسی فائدے کے لئے فساد کرارہی ہے ۔یادو نے چہارشنبہ کو جاری بیان میں کہا کہ بہرائچ تشدد کے معاملے میں ہر دن نئے انکشافات ہورہے ہیں۔ جن سے بی جے پی منھ دکھانے لائق نہیں رہی ہے ۔ بی جے پی کے ایم ایل اے ہی بی جے پی پر سازش کرنے کی ایف آئی آر درج کرارہے ہیں اور فساد چھپے کیمرے کے سامنے سچ اگل رہے ہیں۔انہوں نے کہا کہ بی جے پی سازش کر کے ریاست کا ماحول خراب کررہی ہے ۔ اقتدار کے غرور اور تحفظ میں غریبوں، پچھڑوں، دلتوں، اقلیتوں پر ظلم ڈھارہے ہیں۔ بی جے پی حکومت میں نہ کسی کی جان محفوظ ہے اور نہ کسی کا کاروبار محفوظ ہے ۔ سب کچھ غیر محفوظ ہے ۔ اپنے سیاسی فائدے کے لئے نوجوانوں کو ورغلا کر بی جے پی اپنے کارکنان سے فساد، تشدد اور مجرمانہ کام کراتی ہے ۔یادو نے کہا کہ بی جے پی کے جو تھوڑے بہت حامی ووٹر بچے ہیں بی جے پی کا یہ سازشی اور پرتشدد شکل دیکھ کر اب تو وہ بھی شرمندہ ہیں۔ بی جے پی نے اپنے حامیوں کے جذبات کو گمراہ کر کے ان کا استعمال اپنا اقتدار بچائے ۔بنائے رکھنے کے لئے کیا ہے ۔ اب تو بی جے پی والے بھی کہنے لگے ہیں کہ بی جے پی کسی کی سگی نہیں ہے ۔
