نئی دہلی: عام آدمی پارٹی کی رہنما اور وزیر آتشی نے منگل کو بی جے پی پر دہلی میں صدر راج نافذ کرکے اروند کیجریوال کی زیرقیادت حکومت کو عقبی دروازہ سے گرانے کی سازش کرنے کا الزام لگایا۔ یہ الزام ایک ایسے وقت میں لگایا گیا ہے جب ایک دن پہلے صدر سیکرٹریٹ نے اپوزیشن پارٹی بی جے پی کی ایک میمورنڈم وزارت داخلہ کو بھیجی تھی۔ میمورنڈم میں کہا گیا ہے کہ دہلی کو آئینی بحران کا سامنا ہے۔ آتشی نے میڈیا کے ساتھ بات چیت میں کہا کہ اگر کیجریوال حکومت کا تختہ الٹ دیا جاتا ہے تو دہلی کے لوگ آئندہ اسمبلی انتخابات میں بی جے پی کو صفر سیٹیں دے کر مناسب جواب دیں گے اور عام آدمی پارٹی تمام 70 سیٹیں جیت لے گی۔ دہلی اسمبلی میں قائد حزب اختلاف وجیندر گپتا نے پیر کو کہا کہ بی جے پی ایم ایل ایز کی جانب سے صدر دروپدی مرمو کو جمعہ کے روز آئین کی مبینہ خلاف ورزی پر عآپ کی زیرقیادت حکومت کو برطرف کرنے کا مطالبہ کرنے والا میمورنڈم وزارت داخلہ کو بھیجا گیا ہے۔ گپتا نے الزام لگایا کہ دہلی میں حکمرانی کے نظام میں بے عملی اس لیے پیدا ہوئی ہے کیونکہ وزیر اعلیٰ اروند کجریوال ایکسائز پالیسی کیس میں بدعنوانی کے سنگین الزامات میں چار ماہ سے زیادہ عرصہ سے جیل میں ہیں۔ آتشی نے کہا کہ بی جے پی کا واحد کام اپنے کنول مشن کے ذریعے ملک میں منتخب حکومتوں کو گرانا ہے، جیسا کہ مہاراشٹرا، کرناٹک اور منی پور میں ہوا تھا۔
