رائے بریلی: کانگریس جنرل سکریٹری پرینکا گاندھی واڈرا نے آج بی جے پی کو ہدف تنقید بناتے ہوئے کہا کہ موجود ہ حکومت عوام کے تئیں قطعی جوابدہ نہیں ہے اور یہ صرف عوام کو مذہب کے نام پر گمراہ کر کے ووٹ حاصل کرتی ہے ۔بھائی و کانگریس امیدوار راہول گاندھی کی حمایت میں اونچاہار علاقے میں ایک ریلی سے خطاب کرتے ہوئے پرینکا نے کہا کہ مودی حکومت کی پالیسیوں کی وجہ سے ہر چیز یومیہ مہنگی سے مہنگی تر ہوتی جارہی ہے ۔انہوں نے کہا کہ مودی حکومت نے امیروں کا قرض معاف کیا ان کے وزراء کے بیٹوں نے کسانوں کو گاڑیوں سے کچل دیا۔اس حکومت نے کسانوں کا قرض معاف نہیں کیا۔ انہوں نے کہا کہ بی جے پی والے آئین کو تبدیل کرنے کی بات کرتے ہیں۔راہول گاندھی سچا، سادہ اور ایماندار لیڈر ہیں۔کانگریس لیڈر نے کہا کہ ان کی فیملی کا رائے بریلی سے نسلوں کا ناطہ رہا ہے ۔ اور یہاں سے منتخب ہونے والے کانگریس لیڈران عوام کے تئیں جواب دہ ہوتے تھے ۔ اس موجودہ حکومت میں جوابدہی نام کی کوئی چیز نہیں ہے ۔ اور یہ لوگ عوام کو بس مذہب کے نام پر گمراہ کر کے ووٹ لیتے ہیں۔پرینکا نے امیٹھی ایم پی سمرتی ایرانی کو ہدف تنقید بناتے ہوئے کہا کہ آج رسوئی گیس کی قیمت 1100 روپئے ہے جبکہ اس سے پہلے کانگریس حکومت میں گیس کی قیمت 400 روپئے تھی۔ اس وقت بی جے پی قائدین گیس سلنڈر سر پر اٹھا کر سڑکوں پر اتر جاتے تھے ۔انہوں نے کہا کہ آج 70کروڑ لوگ بے روزگار ہیں۔ امیر اور غریبوں کے درمیان کھائی بڑھتی جارہی ہے۔ سڑکوں، بجلی اور پانی کی جیسی سہولیت میسر ہونی چاہئے ویسی نہیں ہے۔ ملک کے غریب لوگ جیسے کہ عام لوگ، نوجوان اور کسانوں کافی غصے میں ہیں۔
