سہارنپور: 11 جولائی(سیاست ڈاٹ کام) مغربی بنگال کی ممتا حکومت میں مملکتی وزیر (آزادانہ چارج)صدیق اللہ چودھری نے جمعرات کو الزام لگایا ہے کہ آرایس ایس اور بی جے پی مل کر مغربی بنگال میں ترنمول کانگریس کو گرانے کی سازش کر رہے ہیں۔مسٹر چودھری نے مودی حکومت پر ملک میں مذہب کے نام پر لوگوں کے ذہن میں منافرت کا زہر گھولنے کا الزام لگاتے ہوئے کہا کہ وزیر اعلی ممتا بنرجی ڈٹ کر فرقہ پرست طاقتوں کا مقابلہ کرر ہی ہیں اور آر ایس ایس اوربی جے پی کی ماحول خراب کرنے کی کوشش کو کامیاب نہیں ہونے دے رہی ہیں۔ انہوں نے دعوی کیا کہ آنے والے اسمبلی انتخابات میں مغربی بنگال میں تیسری بار ممتا بنرجی کو ریاست کا وزیر اعلی بنائیں گے ۔
