نئی دہلی : بی جے پی نے آج لوک سبھا انتخابات کیلئے اپنا سنکلپ پتر‘مودی کی گارنٹی 2024’ جاری کیا اور ملک میں غریبوں کی فلاح و بہبود کی اسکیموں اور ترقی یافتہ ہندوستان کے عزم کو عملی جامہ پہنانے کا روڈ میپ جاری کیا ہے وزیر اعظم مودی نے بی جے پی کے صدر جگت پرکاش نڈا، مینی فیسٹو کمیٹی کے چیئرمین راج ناتھ سنگھ، وزیر خزانہ نرملا سیتارامن کی موجودگی میں یہ سنکلپ پتر جاری کیا۔ سنکلپ پتر کے اجراء کے بعد، وزیر اعظم مودی نے غریبوں، نوجوانوں، کسانوں اور خواتین کے چار زمروں میں سے ایک ایک شخص کو یہ سنکلپ پتر سونپا۔وزیر اعظم نے کہا کہ 10 برسوں میں بی جے پی نے اپنے منشور کے ہر نکتے کو گارنٹی کے طور پر زمین پر اتارا ہے ۔ انہوں نے کہا کہ بی جے پی نے منشور کے تقدس کو پھر سے قائم کیا ہے ۔ یہ سنکلپ پتر وکست بھارت کے چار مضبوط ستون – یووا شکتی، ناری شکتی، غریب اور کسان ا ن سبھی کو بااختیار بناتا ہے ۔ ہماری توجہ وقار اور معیار زندگی اور سرمایہ کاری کے ذریعے ملازمتوں پر ہے ۔ گزشتہ 10 سال خواتین کے وقار اور ان کے واسطے نئے مواقع کیلئے وقف رہے ۔ آئندہ 5 سال ناری شکتی کی نئی شمولیت کے ہوں گے ۔ انہوں نے کہا کہ غریبوں کیلئے مفت کھانے کی اسکیم مزید پانچ سال جاری رہے گی تاکہ وہ دوبارہ غربت میں نہ پھنس جائیں۔بی جے پی صدر نڈا نے کہا کہ 10 سال ثبوت ہیں کہ مودی کی گارنٹی، گارنٹی پوری ہونے کی گارنٹی ہے ۔اس سنکلپ پتر میں پارٹی نے کہا بھارتیہ جنتا پارٹی غریب، نوجوان، کسان اور خواتین کو لے کر آگے بڑھ رہی ہے اور 2047 تک وکست بھارت کی تعمیر کا عہد لے رہی ہے ۔ ایک ایسا شخص جو آج بھروسے کا مترادف بن چکا ہے کیونکہ مودی کی گارنٹی ہی گارنٹی پوری ہونے کی گارنٹی ہے ۔ آنے والے 5 سال بھی خدمت، گڈ گورننس اور غریبوں کی فلاح و بہبود کے ہوں گے ، یہ مودی کی گارنٹی ہے ۔
