بھونیشور: اڈیشہ کے وزیر اعلی نوین پٹنائک نے بیجو جنتا دل (بی جے ڈی) کی حکومت کے جانے کی الٹی گنتی شروع ہونے سے متعلق وزیر اعظم نریندر مودی کے تبصرہ کی سختی سے تردید کرتے ہوئے کہا ہے کہ بھارتیہ جنتا پارٹی (بی جے پی) اگلے 10 سال میں بھی ریاست کے لوگوں کا اعتماد نہیں جیت سکتی۔مودی نے ہفتہ کو کندھمال، بولانگیر اور بارگڑھ میں اپنی انتخابی ریلیوں کے دوران پٹنائک پر سخت حملہ کیا اور ان پر ریاستی حکومت میں ایسے شخص کو آؤٹ سورس کرنے کا الزام لگایا جسے اوڈیا ثقافت کا کوئی علم نہیں ہے ۔انہوں نے یہ بھی دعویٰ کیا کہ اڈیشہ میں اڑیہ ثقافت اور فخر خطرے میں ہے اور ریاست اپنے بھرپور قدرتی اور معدنی وسائل کے باوجود پٹنائک کے 25 سالہ دور حکومت میں ترقی میں پیچھے رہی ہے ۔وزیر اعظم نے ان جلسوں میں اعلان کیا کہ پٹنائک حکومت کے جانے کی الٹی گنتی شروع ہو گئی ہے ۔ انہوں نے لوگوں کو 10 جون کو بھونیشور میں بی جے پی کے وزیر اعلیٰ کی حلف برداری کی تقریب میں شرکت کی دعوت دی۔اس کے بعد پٹنائک نے ایک ویڈیو پیغام میںمودی پر تنقید کرتے ہوئے کہا کہ بھگوان جگناتھ کے آشیرواد اور عوام کی محبت سے بی جے ڈی ریاست میں لگاتار چھٹی بار حکومت بنائے گی۔ انہوں نے کہا کہ بی جے پی اس بار تو کیا، اگلے 10 سال تک ریاست کے لوگوں کا دل اور اعتماد نہیں جیت سکتی۔ پٹنائک کو اپنے 24 سال کے اقتدار میں مودی کے بارے میں اس طرح کے جارحانہ اور سخت تبصرے کرتے ہوئے کبھی نہیں دیکھا گیا۔پارٹی کے اسٹار کمپینر اور بیوروکریٹ سے لیڈر بنے وی کے ۔ پانڈیان نے اعلان کیا ہے کہ پٹنائک ریکارڈ چھٹی بار بحیثیت وزیراعلیٰ حلف لیں گے ۔
