بی جے پی کو کے سی آر یا اویسی کے سرٹیفکیٹ کی ضرورت نہیں: کشن ریڈی کا متنازع بیان

   

حیدرآباد: وزیر مملکت برائے امور داخلہ جی کشن ریڈی نے پیر کو کہا کہ بی جے پی کو اپنی پالیسیوں پر تلنگانہ کے وزیر اعلی کے چندر شیکھر راؤ یا اے آئی ایم آئی ایم کے سربراہ اسدالدین اویسی سے منظوری کے سرٹیفکیٹ کی ضرورت نہیں ہے۔

بی جے پی کو کے سی آر یا اویسی کے سرٹیفکیٹ کی ضرورت نہیں ہے۔ ہم اس ملک کے لوگوں کی فلاح کو مدنظر رکھتے ہوئے کام کرتے ہیں۔

ریڈی نے کہا کہ تلنگانہ کے وزیر اعلی کے چندریشیکر راؤ نے کہا ہے کہ وہ تلنگانہ میں شہریت ترمیمی قانون پر عمل درآمد نہیں کریں گے۔ انہوں نے یہ بھی کہا کہ بی جے پی کی زیرقیادت مرکزی حکومت ہندوستان کو ہندو راشٹر میں تبدیل کرنے کی کوشش کر رہی ہے۔ انہوں نے مزید کہا کہ وزیر اعلیٰ مجلس سے سمجھوتہ کرنے اور اتحاد بنانے کے بعد بی جے پی کو لیکچر دے رہے ہیں جو مذہب پر سیاست کرتی ہے۔

ریڈی تلنگانہ کے وزیر اعلی کے اس بیان پر ردعمل دے رہے تھے کہ وہ شہریت ترمیمی قانون (سی اے اے) کی مخالفت کریں گے۔

کے سی ار نے کہا تھا کہ میں اس ملک کے وزیر اعظم سے اپیل کرتا ہوں کہ وہ سی اے اے پر دوبارہ غور کریں۔ قومی آبادی کا رجسٹر این آر سی کی طرف پہلا قدم ہے اور یہ پارلیمنٹ میں بھی کہا گیا ہے۔ ہم نے سی اے اے کی مخالفت پارلیمنٹ میں بھی کی ہے اور یہ مرکز کا غلط فیصلہ تھا۔