لکھنؤ: سماج وادی پارٹی صدراکھلیش یادو نے بدھ کے روز کہا کہ ریاست میں موجودہ بی جے پی حکومت میں خواتین اور لڑکیاں سب سے زیادہ ذلیل اور غیر محفوظ ہیں اور خواتین کو بااختیار بنانا صرف ایک نعرہ ہے۔انہوں نے کہا کہ خواتین کی حفاظت کے حوالے سے بی جے پی حکومت کے تمام دعوے غلط ہیں۔ریاست کی نو اسمبلی سیٹوں پر 20 نومبر کو ضمنی انتخابات ہونے والے ہیں اور سماج وادی پارٹی ان تمام سیٹوں پر الیکشن لڑ رہی ہے جبکہ بھارتیہ جنتا پارٹی (بی جے پی) نے اپنے امیدوار آٹھ سیٹوں پر کھڑے کیے ہیں اور اس کی اتحادی راشٹریہ لوک دل (آر ایل ڈی) ایک سیٹ پر الیکشن لڑ رہا ہے۔سماج وادی پارٹی کی طرف سے جاری کردہ ایک بیان میں اکھلیش یادو نے کہا کہ بی جے پی حکومت کے پاس خواتین کو بااختیار بنانے اور تحفظ فراہم کرنے کا کوئی منصوبہ نہیں ہے۔انہوں نے کہا کہ نیشنل کرائم ریکارڈ بیورو (این سی آر بی) کے اعداد و شمار سے یہ واضح ہے کہ ملک میں خواتین کے خلاف جرائم کے سب سے زیادہ واقعات اتر پردیش کی بی جے پی حکومت کے تحت ہو رہے ہیں۔. بی جے پی حکومت خواتین کے خلاف جرائم کو روکنے میں ناکام رہی ہے۔
