ممبئی۔11اپریل (سیاست ڈاٹ کام) بی سی سی آئی نے اپنے مرکزی کنٹریکٹ کھلاڑیوں کے سہ ماہی بقایہ کی ادائیگی کردی ہے۔ اس وقت کورونا وائرس کی وجہ سے دنیا بھر میں کرکٹ سرگرمیاں ٹھپ پڑی ہوئی ہیں اور کئی کرکٹ بورڈ اپنے کھلاڑیوں کی تنخواہ میں تخفیف کررہے ہیں۔کورونا وائرس کی وجہ سے تمام ممالک کے کرکٹ بورڈ کی اقتصادی حالت درست نہیں ہے اور ایسے میں بی سی سی آئی نے کنٹریکٹ کھلاڑیوں کے بقایہ اداکیا ہے۔ بی سی سی آئی نے ساتھ ہی کہا کہ وہ اس کی وجہ سے بے یقینی کی صورت حال کے باوجود کسی کو پریشان نہیں ہونے دے گا۔ غور طلب ہے کہ انگلینڈ اور آسٹریلیا کے کرکٹ بورڈ نے کھلاڑیوں کی تنخواہ میں کمی کے اشارے دیے ہیں۔بی سی سی آئی نے کہا ہے کہ ملک میں 24 مارچ سے جاری لاک ڈاون کے درمیان بی سی سی آئی کسی بھی صورتحال کا سامنا کرنے کے لئے تیار ہے۔ بورڈ نے مرکزی معاہدے میں شامل کھلاڑیوں کے سہ ماہی کے بقایہ ادا کرنے کا فیصلہ کیا ہے۔ اس کے علاوہ انڈیا اور انڈیا اے کے لئے کھیلنے والے کھلاڑیوں کی میچ فیس بھی مالی سال کے آخر تک مکمل طور پر ادا کر دی جائے گی۔بورڈ نے کہا کہ ایک کرکٹ بورڈ نے اپنے کھلاڑیوں کو چھٹی پر ڈال دیا ہے جبکہ دنیا بھر میں ہر جگہ تنخواہ میں کمی کے بارے میں بحث چل رہی ہے لیکن بی سی سی آئی اپنے کھلاڑیوں کا خیال رکھنے کا اہل ہے۔ اس کے بین الاقوامی اور گھریلو کرکٹر پریشان نہیں ہوں گے۔
