نئی دہلی : بورڈ آف کنٹرول فار کرکٹ اِن انڈیا (بی سی سی آئی) اپنی مرد اور خواتین کی کرکٹ ٹیموں کو آئندہ ایشین گیمز 2023 میں شرکت کیلئے بھیجے گا۔ بی سی سی آئی نے اس سے قبل ایشیاڈ 2023 میں اپنی ٹیمیں بھیجنے سے انکار کر دیا تھا۔ چین میں ہونے والے ایشین گیمز میں کرکٹ مقابلے ٹی ٹوئنٹی فارمٹ میں کھیلے جائیں گے۔ ایک میڈیا رپورٹ کے مطابق جب ایشین گیمز منعقد ہوں گے، اسی وقت ہندوستانی کرکٹ ٹیم وطن میں ونڈے ورلڈ کپ کھیل رہی ہوگی۔ ایسے میں بی سی سی آئی ایشیاڈ میں مردوں کے زمرے میں اپنی بی ٹیم بھیجے گا۔ دوسری جانب اگر ہم خواتین کے زمرے کی بات کریں تو ہندوستان کی ٹاپ ویمن کرکٹ ٹیم ایشیاڈ میں اپنا دعویٰ پیش کرے گی۔ ایشین گیمز 23 ستمبر سے 8 اکتوبر تک چین کے شہر ہانگ زو میں منعقد ہوں گے۔ ساتھ ہی آئی سی سی ورلڈ کپ 5 اکتوبر سے 23 نومبر تک کھیلا جائے گا۔ بی سی سی آئی 30 جون تک کھلاڑیوں کی فہرست ہندوستانی اولمپک اسوسی ایشن کو بھیجے گا۔
