نئی دہلی ، 15 مارچ ( سیاست ڈاٹ کام) ہندستانی کرکٹ کنٹرول بورڈ (بی سی سی آئی) نے سنجے منجریکر کو میچ تجزیہ کاروں کی ٹیم سے خارج کرنے کا ایک بڑا فیصلہ کیا ہے۔ ایک رپورٹ کے مطابق ہندستان کے سابق کرکٹر اور کمنٹیٹر سنجے منجریکر کو بی سی سی آئی نے کمنٹری پینل سے باہر کر دیا ہے۔ منجریکر گزشتہ چند سال سے بی سی سی آئی کے کمنٹری پینل کے باقاعدہ رکن ہیں۔ بی سی سی آئی کے اس فیصلے کے بعد ایسا اندازہ لگایا جا رہا ہے کہ ان کی آئی پی ایل میں بھی شرکت ممکن نہیں ہوگی جو کورونا وائرس کی وجہ سے 29 مارچ کی جگہ اب 15 اپریل سے شروع ہو نے کی بات کی جارہی لیکن تاہم حتمی فیصلہ نہیں کیا گیا ہے۔ذرائع کے مطابق اس ہی وجہ سے انہوں نے جنوبی افریقہ کے خلاف پہلے ون ڈے کے لئے دھرم شالہ کا دورہ نہیں کیا۔ یہ میچ ایک گیند بھی پھینکے بغیر بارش کی وجہ سے منسوخ کر دیا گیا تھا۔ اس میچ میں ان کے ساتھی کمنٹیٹر سنیل گواسکر، مرلی کارتک اور لکشمن شیورام کرشن موجود تھے۔واضح رہے کہ کمنٹیٹر نے آئی سی سی ورلڈ کپ 2019 کے دوران ٹیم انڈیا کے اسٹار آل راؤنڈر کھلاڑی رویندر جڈیجہ کو لے کر متنازعہ تبصرہ کیا تھا۔ اس وقت کمنٹیٹر کو کافی تنقید کا سامنا کرنا پڑا تھا۔ مگر اس کے بعد بھی سابق کھلاڑی نے اسے جاری رکھا اور کولکتہ کے تاریخی ایڈن گارڈن میں کھیلے گئے پنک بال ٹیسٹ میچ میں ساتھی مشہور کمنٹیٹرہرشا بھوگلے پر کرکٹ نہ کھیلنے کا تبصرہ کیا تھا۔