نیا قانون روزگار کی ضمانت کے پروگرام میں جوابدہی کو بڑھائے گا: ڈاکٹر مانک ساہا
اگرتلہ۔ 10 جنوری (یو این آئی) تریپورہ کے وزیر اعلیٰ ڈاکٹر مانک ساہا نے بھارت وکاس گرامین روزگار مشن گارنٹی (بی وی۔جی رام۔جی) ایکٹ کو ایک تاریخی کامیابی قرار دیا ہے ، جبکہ دوسری طرف اپوزیشن جماعت سی پی آئی (ایم) نے مودی حکومت کی لیبر پالیسیوں کے خلاف ریاست گیر تحریک چلانے کا اعلان کیا ہے ۔ ڈاکٹر ساہا نے ایک بیان میں کہا کہ اس اقدام کا مقصد دیہی روزگار کو مضبوط بنانا اور پائیدار بنیادی ڈھانچے کی ترقی ہے ۔ انہوں نے زور دے کر کہا کہ نیا قانون روزگار کی ضمانت کے پروگرام میں جوابدہی کو بڑھائے گا، جو پہلے منریگا میں موجود نہیں تھی۔ وزیر اعلیٰ نے کہا کہ پارلیمنٹ پہلے ہی بی وی۔جی رام۔جی ایکٹ منظور کر چکی ہے اور اسے صدر کی منظوری بھی مل گئی ہے ۔ اس کا مقصد سابقہ اسکیموں کی خامیوں کو دور کرنا ہے ۔ تاہم اپوزیشن اس کے فوائد کو کم تر دکھا کر عوام کو گمراہ کرنے کے لیے غیر ضروری تنازعہ پیدا کر رہی ہے ۔اس کے برعکس، سی پی آئی (ایم) کے ریاستی سکریٹری اور لیڈر آف اپوزیشن جتیندر چودھری نے بی جے پی پر ملک کی سب سے اہم روزگار گارنٹی اسکیم کو کمزور کرنے کا الزام لگایا۔ چودھری نے کہا کہ منریگا دیہی مزدوروں کے لیے لائف لائن رہی ہے ، جس نے ہر سال 100 دن کا روزگار فراہم کیا۔ مودی حکومت شروع سے ہی اس کی مخالف رہی ہے اور تریپورہ میں بی جے پی کی بدانتظامی نے اس اسکیم کو بری طرح متاثر کیا ہے ، جس سے دیہی معیشت کو نقصان پہنچا ہے ۔ انہوں نے حکومت پر اسکیم سے مہاتما گاندھی کا نام ہٹانے کی کوشش کرنے کا الزام لگاتے ہوئے اسے ’’انتہائی توہین آمیز قدم‘‘ قرار دیا اور کہا کہ یہ ایک تاریخی فلاحی ورثے کو ختم کرنے کی سیاسی سازش ہے ۔ حکومت جہاں یہ دعویٰ کر رہی ہے کہ نئے قانون کے تحت کام کے دن 100 سے بڑھا کر 125 کیے جائیں گے ، وہیں مسٹر چودھری نے اس دعوے کو مکمل طور پر جھوٹ قرار دیتے ہوئے منریگا کے ادھورے وعدوں کا حوالہ دیا۔ مسٹر چودھری نے کہا کہ بائیں بازو کا محاذ اپنے احتجاج کو ریاست کے ہر گھر تک لے جائے گا۔ سی پی آئی (ایم) نے مطالبہ کیا ہے کہ بی وی۔جی رام۔جی ایکٹ کو فوری طور پر منسوخ کیا جائے ، منریگا کو بحال کیا جائے ، سالانہ 200 دن کے کام کی ضمانت دی جائے اور اجرت بڑھا کر 600 روپے فی مزدور کی جائے ۔ انہوں نے متنبہ کیا کہ جب تک یہ مطالبات پورے نہیں ہوتے ، ان کی پارٹی احتجاج میں شدت لائے گی۔