حیدرآباد19مارچ(یو این آئی) حالیہ بے موسم بارش سے تلنگانہ کے اضلاع میں فصلوں کونقصان پہنچا۔متحدہ نظام آباد ضلع میں کٹائی کیلئے تیار فصلوں کو بارش کے سبب نقصان پہنچا۔ ضلع کے بیرکورو، دھرپلی، اندل وائی، ڈچپلی، بھیمگل، ورنی، سری کونڈہ، نظام آباد رورل اور دیگر منڈلوں میں بارش سے فصلوں کو نقصان پہنچا۔ ضلع میں 6.5 لاکھ ایکڑ اراضی پر چاول کی کاشت کی جاتی ہے ۔ بے وقت بارش سے ایسے وقت میں کسانوں کو شدید نقصان پہنچا۔ طوفانی ہواؤں سے سورج مکھی، جوار کے بیج زمین پر گر رہے ہیں۔ ورنگل میں گرج چمک کے ساتھ بارش سے کئی مقامات پر درخت اور بجلی کے کھمبے گرگئے اور عام زندگی مفلوج ہوگئی۔ ضلع کے بعض منڈلوں میں ژالہ باری سے فصلوں کو شدید نقصان پہنچا۔ آم، مکئی اور چاول کے کسانوں کو نقصان ہوا ہے ۔ باغبانی کی فصلوں کو شدید نقصان کی اطلاع ملی ہے ۔ نیکونڈا، پروت گری اور چناراپیٹ منڈلوں کے کسان بارش سے فصلوں کے بھاری نقصان پر پریشان ہیں جنہوں نے حکومت پر زوردیا کہ ان کی فصلوں کا معاوضہ فراہم کیاجائے ۔ بارش سے ضلع کے مضافاتی علاقہ مامونور میں 10 مکانات منہدم ہوگئے ۔ کریم نگر میں کل رات موسلادھار بارش اور بعض مقامات پر ژالہ باری سے عوام کو پریشانیوں کا سامنا کرنا پڑا۔ کریم نگر جمی کنٹہ اور حضور آباد میں شدید بارش کے باعث نشیبی علاقے زیر آب آگئے ۔ منڈل مراکز کے کئی مواضعات میں کسانوں کی فصلیں تباہ ہو گئیں۔ متعلقہ منڈلوں کے زرعی عہدیداروں کے ابتدائی تخمینہ کے مطابق کل ہوئی بارش سے ضلع میں سینکڑوں ایکڑ اراضی کو نقصان پہنچا۔ ویناونکامنڈل میں گرج چمک کے ساتھ شدید بارش کی وجہ سے کسانوں میں مایوسی دیکھی گئی۔ضلع کے راماڈوگو، شنکرپٹنم، ماناکنڈور، حضورآباد اور جمی کنٹہ منڈلوں میں بارش کی وجہ سے مکئی، جوار، آم اور دھان کے کھیتوں کو شدید نقصان پہنچا ہے ۔
