غیر قانونی بیٹنگ ایپ کیس
نئی دہلی ۔15؍ستمبر( ایجنسیز )اداکارہ اُروشی روتیلا اور بنگلہ فلموں کی حسینہ و ٹی ایم سی کی سابق ایم پی ممی چکرورتی بھی غیر قانونی سٹے بازی ایپ کیس میں ای ڈی کے رڈار پر ہیں۔ دونوں کو اس معاملے میں اتوار کو سمن بھیجا۔ اروشی کو جہاں ایک طرف 16 ستمبر کو دہلی میں واقع ای ڈی دفتر میں پیش ہونا ہے وہیں ممی چکرورتی سے اس معاملے میں آج 15 ستمبر کو پوچھ تاچھ کی گئی ہے۔ میڈیا کے مطابق ای ڈی سے جڑے ذرائع نے بتایا کہ اروشی روتیلا اور ممی چکرورتی کو 1xBet ایپ معاملے میں ای ڈی کے دفتر میں پیش ہونے کے لیے کہا گیا ۔ اس معاملے میں ابھی تک کئی ہائی پروفائل لوگوں سے پوچھ تاچھ ہو چکی ہے جس میں ہندوستانی کرکٹر سریش رینا اور شکھر دھون کے نام بھی شامل ہیں۔بتایا جاتا ہے کہ اُروشی روتیلا نے ’ون ایکس بیٹ‘ نام کے ایک سٹے بازی ایپ کی تشہیر کی تھی۔ اس کا ویڈیو سوشل میڈیا پر دستیاب ہے۔ اسی کی بنیاد پر روتیلا کو پوچھ تاچھ کے لیے بلایا گیا ہے۔دراصل ای ڈی کی جانچ میں سامنے آیا ہے کہ کئی آن لائن بیٹنگ پلیٹ فارم غیر قانونی طریقے سے ہندوستان میں کاروبار پھیلا رہے ہیں۔ انہی میں سے ایک ہے‘ون ایکس بیٹ‘ جس کے اشتہاروں اور پبلسٹی سے کئی بڑی شخصیات وابستہ ہیں۔ جانچ ایجنسی یہ سمجھنا چاہتی ہے کہ آخر ان ستاروں کا کردار ان ایپس کی تشہیر اور پبلسٹی میں کس حد تک رہا ہے۔اس سلسلے میں ای ڈی اس ایپ کی تشہیر کرنے والے سبھی سیلیبریٹی سے پوچھ تاچھ کر رہی ہے۔ الزام ہے کہ 1xBet ہندوستان میں آن لائن سٹے بازی کو تو فروغ دے ہی رہا ہے ساتھ ہی اس کے ذریعہ منی لانڈرنگ بھی کی جا رہی ہے۔
