استنبول ۔ 9 نومبر (ایجنسیز) ترکیہ کے شمال مغربی صنعتی شہر دیلوواسی میں عطر (پرفیوم) کے گودام میں آگ بھڑک اٹھی جس کے نتیجے میں 6 افراد جاں بحق اور 5 زخمی ہو گئے۔میڈیا کے مطابق فائر بریگیڈ، ریسکیو ٹیموں اور میونسپل عملے نے آگ پر قابو پا لیا۔ گورنر آکتاش کے مطابق زخمیوں میں سے ایک کی حالت تشویشناک ہے، اور آگ ہفتے کی صبح 9 بجے لگی تھی۔آکتاش نے بتایا کہ آگ کو تیزی سے قابو میں لا کر بجھا دیا گیا اور آتشزدگی کی وجوہات جاننے کے لیے تحقیقات شروع کر دی گئی ہیں۔ابتدائی میڈیا رپورٹس میں 2 افراد کے زخمی ہونے کی اطلاع دی گئی تھی۔تصاویر میں دکھایا گیا کہ عمارت کی دو منزلیں، جو گودام کے طور پر استعمال ہو رہی تھیں، آگ سے مکمل طور پر تباہ ہو گئیں، آگ لگنے کی وجہ تاحال معلوم نہیں ہو سکی۔ایک عینی شاہد نے میڈیا کو بتایا کہ ’میں نے ایک دھماکا سنا، بالکونی سے دیکھا تو ایک ساتھی کے کپڑوں میں آگ لگی ہوئی تھی، میں نے پانی سے آگ بجھائی، پھر میں نے دیکھا کہ آگ فیکٹریوں کو اپنی لپیٹ میں لے رہی ہے، عمارت کے اندر سے چیخوں کی آوازیں آ رہی تھیں‘۔دیلوواسی استنبول سے تقریباً 70 کلومیٹر کے فاصلے پر واقع ایک صنعتی شہر ہے جہاں درجنوں گودام اور فیکٹریاں قائم ہیں۔