امرتسر، 15 جنوری (یو این آئی) صدر جمہوریۂ ہند، دروپدی مرمو نے آج پنجاب کے امرتسر میں گرو نانک دیو یونیورسٹی کے جلسۂ تقسیم اسناد میں شرکت کی۔ اس موقع پر خطاب کرتے ہوئے صدر جمہوریہ نے کہا کہ رسمی تعلیم مکمل کرنے کے بعد طلباء مختلف سمتوں میں اپنے سفر کا آغاز کریں گے ۔ کچھ سرکاری یا نجی شعبے میں خدمات انجام دیں گے ، دوسرے اعلیٰ تعلیم یا تحقیق کو آگے بڑھائیں گے ، جبکہ بہت سے اپنے کاروبار قائم کریں گے یا درس و تدریس میں اپنا کیریئر بنائیں گے ۔ اگرچہ ہر شعبے میں مختلف قسم کی قابلیت اور مہارت کی ضرورت ہوتی ہے ، تاہم کچھ خصوصیات یکساں طور پر ضروری ہوتی ہیں اور ہر شعبے میں ترقی کیلئے مددگار ہوتی ہیں۔ یہ خصوصیات ہیں-سیکھنے کی مسلسل خواہش اور رغبت، دشوار اور مشکل حالات میں بھی اخلاقی اقدار، دیانتداری اور ایمانداری کی سختی سے پابندی، تبدیلی کو قبول کرنے کی ہمت، ناکامیوں سے سیکھنے اور آگے بڑھنے کا عزم، ٹیم ورک اور تعاون کا جذبہ، وقت اور وسائل کا نظم و ضبط سے استعمال اور علم اور صلاحیتوں کا استعمال انفرادی فائدے کیلئے نہیں بلکہ معاشرے اور قوم کی بھلائی کیلئے کرنا۔ صدر جمہوریہ نے طلباء کو مشورہ دیا کہ وہ یہ یاد رکھیں کہ تعلیم محض ذریعہ معاش نہیں ہے ۔ یہ معاشرے اور قوم کی خدمت کا ذریعہ بھی ہے ۔ انہوں نے کہا کہ وہ اُس معاشرے کے مقروض ہیں جس نے ان کی تعلیم میں حصہ ڈالا ہے ۔ ترقی کے اس سفر میں پیچھے رہ جانے والوں کی ترقی کیلئے کوششیں کرنا قرضوں کی ادائیگی کا ایک طریقہ ہو سکتا ہے ۔
