بی آر ایس نے عوام کے دلوں کو جیت لیا ،تیسری مرتبہ کامیابی یقینی ، ظہیرآباد الگول میں انتخابی جلسہ سے کے سی آر کا خطاب
ظہیرآباد 23 / نومبر ( سیاست ڈسٹرکٹ نیوز ) ریاستی چیف منسٹر و بی آر ایس سربراہ کے چندر شیکھر راؤ نے آج شام یہاں الگول گراونڈ پر منعقدہ ’’ پرجا آشیرواد سبھا ‘‘ کے شرکاء سے خطاب کرتے ہوئے کہا کہ ریاست میں 70 تا 80 اسمبلی نشستوں پر کامیابی حاصل کرتے ہوئے اقتدار پر آنے کا دعویٰ کرنے والی کانگریس پارٹی 20 نشستوں پر بھی کامیابی حاصل نہیں کرے گی ۔ انہوں نے ادعا کیا کہ کسی بھی صورت میں بی آر ایس ریاست میں تیسری میعاد کیلئے اقتدار میں آنے والی ہے ۔ اس میں کسی کو بھی شک و شبہ میں مبتلا ہونے کی چنداں ضرورت نہیں ہے ۔ ا نہوں نے کہا کہ بی آر ایس تشکیل تلنگانہ کے بعد اپنے ساڑھے نو سالہ دورِ حکمرانی میں ترقی اور عوامی بہبود کے بڑے کام انجام دیتے ہوئے عوام کے دلوں کو جیت لیا ہے ۔انہوں نے بہ بانگ دہل کہا کہ بی جے پی ملک کے درپیش مسائل کو بالائے طاق رکھتے ہوئے صرف مذہبی منافرت کے ذریعہ اقتدار حاصل کرنا چاہتی ہے جب کہ ریاست تلنگانہ کو تیزی سے ترقی کی سمت گامزن کرنے والی بی آر ایس حکومت پر کانگریس بے بنیاد اور جھوٹے الزامات عائد کرتے ہوئے اور ریاستی عوام کو 6 ضمانتوں کی تکمیل کے وعدہ کے سہارے بے صبری کے ساتھ اقتدار حاصل کرنے کوشاں ہے ۔ انہوں نے ریاستی عوام کو خبردار کرتے ہوئے کہا کہ کانگریس ایک دھوکہ باز اور ناقابل بھروسہ پارٹی ہے ۔ انہوں نے مسلم اقلیتی رائے دہندوں سے بی آر ایس کو ووٹ دینے کی پْرزور اپیل کرتے ہوئے یاد دلایا کہ دس سال قبل جب تلنگانہ ، آندھرا پردیش میں شامل تھا ۔ اس وقت متحدہ آندھرا پردیش کیلئے 2000 کروڑ روپئے کا اقلیتی بجٹ مختص تھا ۔ تشکیل تلنگانہ کے بعد دس سال میں 12000 کروڑ روپئے کردیا گیا ۔ اقلیتی طلبہ کی تعلیم کیلئے اقلیتی اقامتی اسکولس و جونئیر کالجس قائم کئے گئے ۔ اس کے بعد بتدریج ڈگری کالجس بھی قائم کئے جائیں گے ۔ انہوں نے کہا کہ بی آر ایس حکومت سب کو ساتھ لے کر چلتی ہے – ہندو ، مسلم اس کی دو آنکھیں ہیں ۔ انہوں نے پْرزور الفاظ میں کہا کہ تلنگانہ ایک ایماندار ریاست ہے – جب تک کے سی آر زندہ ہے ۔ سیکولرازم پر آنچ آنے نہیں دی جائے گی ۔ انہوں نے مرحوم محمد فریدالدین کی بی آر ایس کیلئے کی گئی خدمات کو ناقابل فراموش قرار دیا اور کہا کہ موصوف کی خدمات کو پیش نظر رکھتے ہوئے انہوں نے ان کے صاحبزادہ محمد تنویرالدین کو ریاستی صنعتی ترقیاتی کارپوریشن کا چیرمین بنایا ہے۔انہوں نے موجودہ رکن اسمبلی و بی آر ایس امیدوار کونینٹی مانک راؤ کو بھاری اکثریت سے منتخب کرنے کی عوام سے اپیل کرتے ہوئے کہا کہ وہ ایک عوامی خدمت کا جذبہ رکھنے والی شخصیت ہے جو عوام کے درمیان چوبیس گھنٹے دستیاب رہتی ہیں ۔عوام کو چاہئے کہ وہ ہمیشہ دستیاب رہنے والے بی آر ایس امیدوار کو منتخب کرنے کو ترجیح دیں۔ رکن پارلیمنٹ ظہیرآباد بی بی پاٹل ، بی آر ایس امیدوار کونینٹی مانک راؤ نے بھی خطاب کیا – شہ نشین پر ریاستی وزیر خزانہ وصحت ٹی ہریش راؤ ، صدرنشین ریاستی صنعتی ترقیاتی کارپوریشن محمد تنویرالدین صدرنشین ایس سی ترقیاتی کارپوریشن وائی نروتم ، ڈی سی یم ایس چیرمین ملکاپور شیوکمار ، کین ڈیولپمنٹ کونسل چیرمین اوما کانت پاٹل ، پارٹی الیکشن انچارج دیوی پرشاد ، مقامی سرکردہ قائدین کے بشمول ہندو ، مسلم اور دیگر طبقات سے تعلق رکھنے والے مرد وخواتین کی کثیر تعداد نے اپنی شرکت درج کرائی ۔ جلسہ گاہ انسانی سروں کا سمندر لگ رہا تھا – چیف منسٹر ہیلی کاپٹر کے ذریعہ وقت مقررہ پر جلسہ گاہ پہنچے تھے اور تقریباً 50 منٹ تک خطاب کرنے کے بعد روانہ ہوگئے ۔