حیدرآباد 27نومبر (یو این آئی) تلنگانہ بھر میں پنچایت انتخابات کے پہلے مرحلہ کا عمل جمعرات سے شروع ہو گیا ہے ۔ اس مرحلہ میں 189 منڈلوں میں سرپنچ کی جملہ4,236 نشستوں اور وارڈ ارکان کی 37,440 نشستوں پر پولنگ ہوگی۔ متعلقہ اضلاع کے کلکٹرس نے آج انتخابی نوٹیفکیشن جاری کردیا جس کے ساتھ ہی پرچہ نامزدگی کا عمل شروع ہوگیا۔ امیدوار 29 نومبر تک پرچہ نامزدگی داخل کر سکتے ہیں۔
انتخابی ضابطہ اخلاق کیلئے اسکریننگ کمیٹی ‘ چیف سکریٹری صدر ہونگے
حیدرآباد 27 نومبر (سیاست نیوز) پنچایت راج اداروں کے چناؤ کے سلسلہ میں انتخابی ضابطہ اخلاق کے نفاذ کے سلسلہ میں اسکریننگ کمیٹی تشکیل دی گئی ہے۔ چیف سکریٹری رام کرشنا راؤ کمیٹی کے صدرنشین ہوں گے۔ ارکان میں مختلف محکمہ جات کے سکریٹریز، جنرل اڈمنسٹریشن ڈپارٹمنٹ کے پرنسپل سکریٹری اور محکمہ پنچایت راج کے پرنسپل سکریٹری کو شامل کیا گیا ہے۔ اسکریننگ کمیٹی انتخابی ضابطہ اخلاق کے نفاذ کے سلسلہ میں الیکشن کمیشن کو رپورٹ پیش کرے گی جس کی بنیاد پر کمیشن کارروائی کرے گا۔ الیکشن کمیشن نے انتخابی ضابطہ اخلاق پر سختی سے عمل کا فیصلہ کیا۔1