نظام آباد۔ 24 اکتوبر (سیاست ڈسٹرکٹ نیوز) تلنگانہ جاگروتی صدر و رکن قانون ساز کونسل محترمہ کے کویتا کل بروز ہفتہ 25؍اکتوبر ’’جاگرتی جنم باٹ‘‘ پروگرام کے سلسلے میں نظام آباد کا دورہ شروع کر رہی ہے تفصیلات کے مطابق کل یہ صبح 9 بجے محترمہ کویتا بنجارہ ہلز حیدرآباد میں واقع تلنگانہ جاگروتی دفتر سے روانہ ہوں گی اور اسمبلی کے روبرو واقع گن پارک میں شہداء تلنگانہ کے یادگار ستون پر خراج عقیدت پیش کریں گی۔ گن پارک میں صبح 9:30 بجے میڈیا سے بات چیت کریں گی۔بعد ازاں 1 بجے اندلوائی ٹول گیٹ پر جاگروتی کے کارکنان ان کا پرتپاک استقبال کریں گے۔ 1:30 بجے ایناڈو آفس نظام آباد سے بائیک ریالی کا آغاز ہوگا جو مختلف راستوں سے گزرتی ہوئی 2 بجے نظام آباد میں تلنگانہ جاگرتی دفتر پہنچے گی، جہاں محترمہ کویتا تلنگانہ تلی کے مجسمے کو خراج عقیدت پیش کرتے ہوئے عوام سے خطاب کریں گی۔شام 4 بجے ناوی پیٹ منڈل کے یانچ گاؤں میں وہ گوداوری سیلاب سے متاثرہ خاندانوں سے ملاقات کریں گی اور ان کے مسائل کا جائزہ لیں گی۔ اس کے بعد شام 6 بجے نندی پیٹ منڈل کے سی ایچ کونڈور گاؤں میں واقع مندر کا دورہ کرے گی۔اس دورے کا مقصد عوام سے براہ راست میل جول بڑھانا، ریاستی ترقی کے لیے تجاویز حاصل کرنا اور سیلاب متاثرین کے مسائل کو حکومت تک پہنچانا بتایا گیا ہے۔
