حیدرآباد11اگست (یواین آئی)تلنگانہ حکومت کی جانب سے شروع کردہ ہائی۔فائی پراجکٹ کے بہتر نتائج سامنے آرہے ہیں۔ ہائی اسپیڈ فری سٹی وائی فائی سے شہریوں کے ساتھ ساتھ بستی دواخانوں کو بھی کافی مدد مل رہی ہے ۔اس سلسلہ میں وزیرانفارمیشن ٹکنالوجی کے تارک راما راو کی جانب سے سوشیل میڈیا کے اہم پلیٹ فارم ٹوئیٹر پر پوسٹ کردہ ایک منٹ 10سکنڈ کی ویڈیوجس کو اب تک کئی افرادنے دیکھا ہے میں اس پراجکٹ کی ستائش کی جارہی ہے ۔اس ویڈیومیں بستی دواخانہ بورابنڈہ کی میڈیکل آفیسر ڈاکٹرشریجنا نے کہا کہ ان کاکام مریض کی تشخیص کے ساتھ ساتھ اس کی تفصیلات کو بھی پورٹل میں آن لائن کرنا ہے ۔
اسٹاف نرس کی جانب سے مریض کے مختلف نمونے حاصل کئے جاتے ہیں اور تلنگانہ ڈائگناسٹک پورٹل میں ڈاٹا کو پُرکرنا ہوتا ہے ۔قبل ازیں بستی دواخانہ کے سلم علاقہ میں ہونے سے اس ڈاٹاکو آن لائن کرنے میں کئی چیلنجس کا ان کو سامناکرناپڑتاتھاتاہم اب حکومت کی جانب سے اے سی تی فائبرنٹ کو نصب کرنے کے بعد نٹ ورک کے مسائل حل کرلئے گئے ہیں ۔