ملک اور بیرون ملک کی نامور شخصیتیں شامل، حکومت کے ترقیاتی منصوبہ میں تعاون، آر بی آئی کے سابق گورنرس کی شمولیت
حیدرآباد 27 نومبر (سیاست نیوز) تلنگانہ حکومت نے تلنگانہ رائزنگ ویژن 2047 پر عمل آوری کے سلسلہ میں ماہرین پر مشتمل اڈوائزری کونسل تشکیل دیا ہے۔ اڈوائزری کونسل نے معیشت، انتظامی اُمور، نظم و نسق، انڈسٹری، ٹیکنالوجی، تعلیم، روزگار اور دیگر شعبہ جات کے ماہرین کے علاوہ سیول سوسائٹی کے نمائندوں کو شامل کیا گیا تاکہ وہ ویژن 2047 پر مؤثر عمل آوری کو یقینی بنائیں۔ 16 رکنی مشاورتی کونسل میں شامل کئی ماہرین نے 8 اور 9 ڈسمبر کو مجوزہ گلوبل سمٹ کی تیاریوں کے سلسلہ میں حکومت کو تجاویز پیش کی ہیں۔ مشاورتی کونسل میں شامل کئے گئے ماہرین میں نوبل انعام یافتہ ابھیجیت بنرجی، سابق آئی اے ایس عہدیدار ارونا رائے، آر بی آئی کے سابق گورنرس ڈی سبا راؤ، رگھورام راجن، پدمابھوشن کرن مجمدار، مرکزی حکومت کے سابق چیف اکنامک اڈوائزر اروند سبرامنین، سی آئی آئی کے سابق صدر کے گوپالا کرشنن، رکمنی بنرجی، میکسیسے ایوارڈ یافتہ بیزواڑہ ویلسن، معاشیات اور عوامی پالیسی کے ماہر سنتوش ملہوترہ، سابق آئی اے ایس عہدیدار ہرش مندر، ڈیجیٹل کریٹیویٹی کے ماہر شانتانو نارائن، نامور ماہر معاشیات ہیمانشو، ماحولیاتی اُمور کے ماہر ارونب گھوش، ہندوستان میں پالیسی اُمور کے ماہر موہن گرو سوامی اور اقوام متحدہ کی اعلیٰ اختیاری اڈوائزری بورڈ کے رکن جینتی گھوش شامل ہیں۔ ماہرین نے حالیہ عرصہ میں چیف منسٹر ریونت ریڈی کے ساتھ اجلاس منعقد کرتے ہوئے تلنگانہ رائزنگ 2047 کی کامیابی میں تعاون کا یقین دلایا۔ مشاورتی کونسل حکومت کو منصوبہ بندی اور پالیسی فیصلوں میں رہنمائی کرے گا۔ عالمی اداروں سے سرمایہ کاری کے علاوہ حیدرآباد کو بیسٹ انفراسٹرکچر سٹی میں تبدیل کرنے کے لئے تجاویز پیش کریں گے۔ بتایا جاتا ہے کہ حکومت نے نوجوانوں، خواتین اور کسانوں سے متعلق اُمور پر پالیسی فیصلوں میں رہنمائی کی خواہش کی ہے۔ حکومت کے عہدیداروں کی جانب سے مشاورتی کونسل کو درکار معلومات فراہم کی جائیں گی جس کی بنیاد پر وہ حکومت کو تجاویز پیش کریں گے۔ اڈوائزری کونسل کے اجلاس ورچول منعقد ہوں گے تاکہ ملک اور بیرون ملک میں مقیم ارکان آن لائن اجلاس میں شرکت کرسکیں۔ حکومت کے پلاننگ ڈپارٹمنٹ کو اڈوائزری کونسل سے بہتر تال میل کے لئے ذمہ دار قرار دیا گیا ہے۔ ذرائع نے بتایا کہ 9 ڈسمبر کو تلنگانہ رائزنگ ڈاکومنٹ کی اجرائی کے موقع پر مشاورتی کونسل کے تمام ارکان موجود رہیں گے۔1
