۔139 مراکز ، پہلے دن 4000 ہیلت ورکرس کو خوراک، مودی دو مراکز سے ربط قائم کریں گے
حیدرآباد: تلنگانہ حکومت نے ملک کی دیگر ریاستوںکی طرح کل 16 جنوری سے کورونا ویکسین ٹیکہ اندازی کی بڑے پیمانہ پر تیاریاں مکمل کرلی ہیں ۔ 33 اضلاع کے 139 مراکز پر ہفتہ سے ٹیکہ اندازی کا آغاز ہوگا ۔ 99 سرکاری اور 40 خانگی مراکز پر ٹیکہ اندازی کا انتظام رہے گا ۔ وزیراعظم نریندر مودی ملک بھر کے لئے ٹیکہ اندازی مہم کا نئی دہلی سے آن لائین آغاز کریں گے ۔ چیف منسٹر کے چندر شیکھر راؤ نے چیف سکریٹری سومیش کمار کو ہدایت دی ہے کہ تمام ٹیکہ اندازی مراکز پر ضروری سہولتوں کو یقینی بنایا جائے۔ انہوں نے کورونا سے بچاو کے لئے کووڈ قواعد پر سختی سے عمل آوری اور ہر مرکز کے قریب ری ایکشن کی صورت میں علاج کے انتظامات کی ہدایت دی۔ چیف سکریٹری نے ضلع کلکٹرس سے ٹیلی کانفرنس کے ذریعہ ٹیکہ اندازی کے انتظامات کا جائزہ لیا ہے ۔ پہلے مرحلہ میں ٹیکہ اندازی کیلئے جن افراد کی نشاندہی کی گئی ، انہیں مراکز پر پہنچنے کی اطلاع کردی گئی ہے۔ ڈائرکٹر پبلک ہیلت ڈاکٹر سرینواس راؤ نے بتایا کہ کورونا ویکسین کی پہلی کھیپ حیدرآباد پہنچ چکی ہے اور اسے متعلقہ مراکز کو منتقل کردیا گیا ہے ۔ پونے کے سیرم انسٹی ٹیوٹ سے کورونا ویکسین محکمہ صحت کے قائم کردہ اسٹوریج واقع کوٹھی میں محفوظ کیا گیا ہے۔ محکمہ صحت کو پہلے مرحلہ میں 3.64 لاکھ خوراک کے نسخے وصول ہوئے ہیں۔ وزیراعظم نریندر مودی گاندھی ہاسپٹل سکندرآباد اور پرائمری ہیلت سنٹر نارسنگی سے آن لائین ربط قائم کرتے ہوئے ٹیکہ اندازی کا جائزہ لیں گے ۔ وہ ہیلت ورکرس سے بات چیت کرسکتے ہیں۔ سرینواس راؤ نے بتایا کہ ہر مرکز پر ٹیکہ اندازی کے ماہر کے علاوہ سینئر ڈاکٹرس کو متعین کیا جارہا ہے تاکہ ویکسین سے ری ایکشن کی صورت میں فوری علاج کیا جاسکے۔ وزیر صحت ای راجندر نے عہدیداروں کے ساتھ ٹیکہ اندازی کے انتظامات کا جائزہ لیا ۔ راجندر نے اعلان کیا تھا کہ وہ پہلا ٹیکہ خود لیں گے لیکن بعد میں انہوں نے صفائی کرم چاری کو پہلا ٹیکہ دینے کی بات کہی۔ مراکز پر خصوصی کولڈ اسٹوریج کی سہولت فراہم کی گئی ہے۔ 10,000 سے زائد ہیلت ورکرس کو ٹیکہ اندازی کی تربیت دی جاچکی ہے ۔ ریاست میں تقریباً 3 لاکھ ہیلت ورکرس جن کا تعلق سرکاری اور خانگی شعبہ سے ہے، پہلے مرحلہ میں ٹیکہ اندازی میں شامل کئے جائیں گے۔ ٹیکہ اندازی کے پہلے دن 4000 ہیلت ورکرس کا احاطہ کیا جائے گا۔ مرکزی حکومت نے ریاستوںکو ہدایت دی ہے کہ کورونا متاثرین کے علاج میں مصروف ہیلت ورکرس کو ترجیح دی جائے ۔ ہفتہ میں چار دن تک ٹیکہ اندازی کا سلسلہ جاری رہے گا جبکہ اتوار کو چھوڑ کر باقی ایام میں دیگر مریضوں کا شکار افراد کو ویکسین دی جائے گی۔
