ایک دن میں 2.35 لاکھ سلنڈروں کی فراہمی
حیدرآباد۔ 18مارچ (یو این آئی) تلنگانہ اسٹیٹ سیول سپلائیز کارپوریشن نے واضح کیا ہے کہ ریاست میں ایل پی جی سلنڈروں کی کوئی قلت نہیں ہے اور سپلائی مستحکم اور کافی ہے ۔ چہارشنبہ کے روز جاری کردہ ایک پریس ریلیز میں حکام نے بتایا کہ منگل کو کل 2,35,678 ایل پی جی سلنڈر فراہم کیے گئے جو کہ عام روزانہ کی اوسط 2,15,151 سلنڈروں سے زیادہ ہے ۔ صارفین کو مشورہ دیا گیا ہے کہ وہ سلنڈر ری فلنگ کے حوالے سے کسی بھی قسم کی گھبراہٹ یا پریشانی کا شکار نہ ہوں۔ تقسیم کے عمل کو ہموار بنانے اور کسی بھی قسم کی رکاوٹ کو روکنے کے لیے حکومت نے سیول سپلائیز کارپوریشن کے دفتر میں ایک ’کمانڈ اینڈ کنٹرول سینٹر‘ قائم کیا ہے ۔ اس سینٹر میں سرکاری حکام کے ساتھ ساتھ بڑی آئل مارکیٹنگ کمپنیوں‘ انڈین آئل کارپوریشن ، ہندوستان پیٹرولیم کارپوریشن لمیٹڈ اور بھارت پیٹرولیم کارپوریشن لمیٹڈ کے نمائندے بھی شامل ہیں۔ کمپنیوں کے اعداد و شمار کے مطابق، آئی او سی ایل نے اپنی اوسط سے ایک فیصد اضافے کے ساتھ 93,887 سلنڈر فراہم کیے ۔ ایچ پی سی ایل نے 11.98 فیصد اضافے کے ساتھ 84,156 سلنڈر فراہم کیے جبکہ بی پی سی ایل نے 22.63 فیصد کے نمایاں اضافے کے ساتھ 57,635 سلنڈر فراہم کیے ۔ حکام کا کہنا ہے کہ اوسط سے زیادہ سپلائی ایل پی جی کی بلاتعطل دستیابی کو یقینی بنانے کیلئے حکومتی کوششوں کی عکاسی کرتی ہے ۔
انہوں نے عوام پر زور دیا کہ وہ صرف سرکاری معلومات پر بھروسہ کریں اور بلاوجہ پریشان ہونے سے گریز کریں۔
